Kohhran Hmeichhe Inkhawmpui Lian a tiak ta

Thenzawl-a Kohhran Hmeichhe Inkhawmpui lian neih chu nizan khan a tiak ta a, kum 2027-a Kohhran Hmeichhe Inkhawmpui Lian chu North Vanlaiphai-ah neih leh tur a ni ang.
Presbyterian Kohhran-a Kohhran Hmeichhe Inkhawmpui Lian hi Zirtawpni zan atang khan Thenzawl Lothazawl ah neih niin Inrinni khan Thenzawl Field Veng Kohhran Biak In-ah Khawmpui Palai ten ro an rel a, General Agenda 7 awmin an thu passed zingah Synod Hospital, Durtlang leh John Williams Hospital, Lunglei pualin tumkhat inkhawm thawhlawm lakkhawm te, Zuk leh hmuam dona a rampum huapa hmalak te, HIV/AIDS natna hlauhawm zia inzirtir te, Plastic bawlhhlawh paih/tihral dan tha uar zawka inzirtir te a tel a. “Rampum huapin kan tu leh fate Biak In-a hruai uar lehzual tura inzirtirna neih ni rawh se,” an ti bawk.

Rorel Inkhawm hian Inkhawmpui lian leh Rorel inkhawm neihna hmun tur pawh ruahman nghal niin kum 2026 Rorel Inkhawm chu Champhai Vengthlang-ah neiin kum 2027 Inkhawmpui Lian chu North Vanlaiphai-ah neih a ni anga, kum 2028 Rorel Inkhawm chu Sihphir-ah neih a ni ang. Preabyterian Kohhran Hmeichhia-ah hian ram pumah member 2,03,840 an awm mek a, Champhai Vengthlang Bial chu member tamna ber Bial niin Member 3,039 an awm a ni.