Home Minister rawn zin dawn

Union Home Minister Amit Shah chuan naktuk Inrinni hian lehlangin Mizoram a rawn tlawh dawn a, Zokhawsang-a Assam Rifles insawnna puala hun hman a telpui ang.

Thudawn danin Union Home Minister hian Vawiin March ni 14 atanga ni 16 inkar hian Mizoram thenawm Assam a tlawh dawn a, hetah hian Mizoram pawh rawn tlawh tel ve in March ni 15 chawhnu hian Zokhawsang-a Assam Rifles insawnna puala programme buatsaih a hmanpui dawn a, hun a hmanpui zawh hian Guwa-hati-ah let leh nghal dawn a ni. Nimin-a Assembly thutkhawm ah Speaker Lalbiakzama chuan Chief Minister sawmna angin Union Home Minister Amit Shah chuan Inrinni-ah Aizawl a rawn tlawh dawn thu leh hetah hian Assam Rifles te Zokhawsang-a an insawn theihna tur Farewell function chu 23 Sector Assam Rifles Khatla-ah chawhnu dar 3:00-ah hun hman tur a ni tih a sawi bawk. 

Assam Rifles te Zokhawsang-a insawn tur chungchang hi nikum October ni 23 khan Mizoram sawrkar leh Assam Rifles aiawh ten New Delhi Mizoram House-ah inremna an ziak tawh a, he inremna ah hian Assam Rifles te chuan Lam-mual leh a chhehvela Assam Rifles hmun, Unit Hospital, Loch House, Quarter Guard leh hmun hrang hrang an chhuahsan ang a, hetihlai Assam Rifles 23 Sector Headquarter Khatla leh DIG chenna Raj Bhavan bul ami chu an chhuahsan dawn lo a ni. Sawrkar hotute sawi danin Assam Rifles in ram an chhuahsan tur hi Restriction of Use of Transferred Land Act 2022 tlawh chhanin Mizoram sawrkar ram a ni nghal dawn a ni.

Aizawl khawpui laili atanga Assam Rifles te Zokhawsang-a sawn chungchang hi kum 1988-a Laldenga kaihhruai MNF Sawrkar lai atanga intan a ni a, tualchhunga buaina thlengah sipaiten tualchhung mi 11 an that a, heta tang hian mipui thin-lungah Assam Rifles te Zokhawsang-a sawn duhna boruak a lian chho hle a, hmalakna hrang hrang kalpui niin kum 2023 khan Assam Rifles Zokhawsang Complex chu hawn a ni tawh a ni.