Universal Health Care Scheme kalpui turin sawrkar in thui takin hma a la tawh tih sawi

Health & Family Welfare Minister Lalrinpuii chuan Universal Health Care Scheme kalpui turin Sawrkar chuan thui tak hma la tawhin, Scheme thar hman tan thuai a nih theih nana inbuatsaihna hmawr bawk tep a ni tawh tih a sawi.

Nimin-a Assembly Inkhawm ah Congress Member C. Ngunlianchunga zawhna chhangin Health Minister chuan Health Care Scheme chu Cashless-a kalpui a la ni loh thu leh Health Care Scheme Cashless-a kalpuina tur Scheme thar, Universal Health Care Scheme chu hman tan a la nih loh avanga Cashless in kalpui a la ni lo tih a sawi a. Health Care Scheme Cashless-a kalpuina tur Scheme thar, Universal Health Care Scheme hman tan thuai a nih theih nan Sawrkar chuan ngawrh takin inbuatsaihna a kalpui mek thu pawh sawiin, “Universal Health Care Scheme kalpui tur hian Sawrkar chuan thui tak hma la tawhin, mipuite tana Scheme chhenfakawm lehzual a nih theih nan leh State chhung leh pawna damdawi In tam zawkah he Scheme hi mipui ten an hman ngei theih nan Sawrkar chuan ngawrh takin hma a la a. Scheme thar hi paperless-a kalpui vek tur a nih dawn avangin Scheme kalpuina tur atana IT lama thil tul hrang hrangte pawh buaipui fel thawkhat tawh a ni,” a ti a ni.

Union Health & Family Welfare Minister in Mizoram Health Minister hnenah Special Package pek a tiam chungchanga zawhna pawh chhangin Health Minister chuan, “Mizoram Health Minister in Union Health & Family Welfare Minister in Special Package pek a tiam anga a lo sawi tawh hi tun dinhmun ah dawn a la ni lo,” a ti a. Dawn a la nih loh chhan zawhna chhangin, “Dawn a nih loh chhan hi Ministry a in thlak a, Minister thar kan neih tak in min pek theih loh vang a ni,” a ti bawk.

Block Public Health Unit (BPHU) chungchanga Member te zawhna pawh chhangin sawrkar-in Block Public Health Unit (BPHU) functional pasarih (7) a nei mek tih Health Minister chuan a sawi a, Central Sawrkar atanga sum hmuh belh a nih chuan Functional BPHU te hi neih belh tura ruahmanna a awm thu leh hmun 14-ah siam belh tura ruahman a ni tih a sawi a. District Hospital, Siaha-ah CSR atangin CT Scan khawl dah tumna a awm loh thu sawiin, amaherawhchu, Mizoram Health Systems Strengthening Project (MHSSP) atangin dah tum a nih thu leh tunah hian a dahna hmun tur (Civil Works) siam tura hmalak mek a nim tih a sawi a. Food Safety and Standard Authority of India (FSSAI) in Food Safety chungchanga score a siam ah Mizoram chu hmarchhak State-ah a hniam ber a nih thu a sawi bawk.