Hmeichhiate Ni hman a ni

Khawvel puma hmeichhiate ni, ‘International Women's Day’ chu Inrinni khan hmun hrang hrang ah hman niin Mizoram-ah pawh he ni pual hian hun hman a ni.

Khawvel huap Hmeichhiate Ni ah hian Minister Lalrinpuii chuan Zoram mipuite chibai bukin, Hmasawnna tluantling nei tur chuan hmeichhiate dinhmun chawikan a pawimawh takzet tih a sawi a. MLA Baryl Vanneihsangi chuan he ni puala Akashvani kaltlanga thuchah a sawi ah hmeichhia ten nih theih loh an nei lova, duhna tak tak an neih chuan an thei a, inlungrualna leh induhsakna a pawimawh hle tih a sawi bawk a ni.

International Women's Day pual hian Akashvani Aizawl chuan Tuikhuahtlang-a AIR Multipurpose Hall-ah hun hmangin he hun hi Akashvani Mizoram Director leh Cluster Head ni bawk DR Lalropuia chuan a hmanpui a, khawvel puma hmeichhia te ni pualin kalkhawm te chu chibai a buk a. Hmeichhe thil tih theihna chu khawvel thil tih theihna a ni tih hre rengin, chumi kawnga hmalakna chak taka kalpui chu an thupui a ni tih a sawi a. Programme Executive Lalram-mawii Hmar pawhin Akashvani Aizawl chu hmei-chhiate ngaih pawimawhna hmun leh entirna hmun tha tak anih thu a sawi bawk.

BJP Mizoram Mahila Morcha chuan Aizawl a BJP State Office-ah he ni pual hian hun hmangin hmeichhia te hmasawnna tura sawrkar in rua-hmanna a neih te an tarlang a ni.

Khawvel huapa hmeichhia te ni-ah hian President Droupadi Murmu chuan hmeichhia-te pawimawh zia sawiin, ram hmasawnna atan an pawimawh hle tih a sawi a, ram leh hnam, khaw-tlang tana an thil tih ropui tak te avangin lawmthu a sawi a, hmeichhia te hmasawnna atan sawrkar chuan theihtawp a chhuah zel dawna ti bawk. Vice President Jagdeep Dhankar leh Prime Minister Narendra Modi pawhin khawvel puma Hmeichhia te ni pual hian hmeichhia te duhsakna chibai an hlan bawk a ni.