Sports Minister inkhawmpui-ah Mizoram atangin tel

India rama Sports Minister te inkhawmpui, ‘Chintan Shivir of Ministers of Youth Affairs and Sports of States/UTs’ chu Zirtawpni leh Inrinni khan neih niin Mizoram atangin Sports Minister Lalnghinglova Hmar chu a tel a ni.

Ministry of Youth Affairs and Sports (YAS) buatsaih Sports Minister Conference hi hi Hyderabad-a Kanha Shanti Vanam-ah neih niin Union Youth Affairs & Sports Minister Dr. Mansukh Mandaviya leh Minister of State Raksha Nikhil Khadse te’n an kaihruai a. Session pasarih awmin, Mizoram Sports Minister Lalnghinglova Hmar chu Session pahnih, ‘Talent Search and Nurturing of Grass-root Talent’ leh ‘Welfare of Sportspersons & Coaches and Sports Recruitment Policy’ ah te Co-Chair a ni.

Sports Minister chuan Mizoram-ah Local Cable TV te nen tangkawpin Sports League kalpui thin a nih thu a tarlang. “Football, Basketball leh Volleyball-ah te Local Media nen tangkawpin State League mumal tak kan kalpui a, mihring nuai 11 chauh ni chungin Indian National Football Team hnuhnung berah Mizo player pali an tel thei. Sports hmasawnna’n media nena thawhhona tha neih hi a pawimawh tawlh tawlh dawn a ni,” tiin Mizoram Model chu State dang tan pawh entawntlaka tha a nih thu a sawi a. Central sawrkarin ‘One Corporate Sector - One Sport Discipline’ kalpui a tum chu lawmawm a tih thu a sawi a, chutih rualin Mizoram ang State tê leh Industry lian awm lohna te pawhin an hlawkpui lehzual turin ‘One Corporate Sector - One state’ anga her rem a rawt bawk.

Mizoram Sports Minister chuan Sports thiamna chu Skill pawimawh tak a ni tih pawh sawiin, Mizoram chuan Olympic 2036 vision nei chungin sports-a hmasawnna leh Skill development kaihkawp a tum tih a tarlang a. Tun atangin India infiammite thatna leh thiam zawng chhût a, Olympic Medal la tam thei tur zawnga inherrem a tul tih a sawi a. Mizoram in Badminton-a hma a sawn mekah Conference-a tel ve Pullela Gopichand chungah lawmthu a sawi bawk.

He Conference-ah hian Athlete tha chherchhuak tura Coaching tha a pawimawh thu te, Selection process ‘fair’ leh langtlang nei tura hmalak te pawh ngaihtuah a ni a. Sportsperson leh Coach te hamthatna chungchang te leh thalai kaihnawih (youth affairs) dang sawiho a ni bawk a. India rama State 28 leh Union Territory 8 atangin Minister leh Official thahnem tak an tel a. Anni bakah Ministry of Youth Affairs and Sports, Sports Authority of India leh National Sports Federation hruaitute leh sports expert thahnem tak an tel bawk. Mizoram atanga tel Sports Minister hi Mark Lalthanliana, Joint Secretary, Sports & Youth Services leh H. Lalramenga, PS te’n an tawiawm a ni.