P&E Minister in kawphetha tihchangtlunna a hawng

Power & Electricity Minister F. Rodingliana chuan Inrinni khan kawlpetha tihchangtlunna tur, Sihmui atanga Zuangtui Sub-Station 132 kV Single Circuit Line leh 11kV Chite Sub-Station bun thar te a hawng a, P&E Minister hlui R. Lalzirliana pawhin he hun hi a telpui a ni.

Kawlphetha pekchhuahna tihchangtlunna tur hawnna hunah hian P&E Minister F. Rodingliana chuan Mizoram in kawlpetha lamah kan intodelhna tura atana hmalakna hrang hrang kal mekte, kawlpetha lak leh semna kawnga line tihchangtluanna te, kawlpetha mumal zawka mipuiin an hmuh thei nana Department hmalakna te a tarlang a. Hengte hi Sawrkarin a ngaihpawh hmasawnna tluantling leh inhen chho sustainable development hmalakna zel a nih thu te a sawi a. Sawrkar in kawlpethaa intodelhna chu a ngaih pawimawh avangin Tuivai, Chhimtuipui, Turini leh Tlawng khuahna tur chu a tharthawh leh thu pawh sawiin, nizung atanga kawlpetha siamchhuah kawngah te pawh tan lak mek dante a sawi lang bawk.

ZPM chuan sawrkarna an chan veleh Power-a kan intodelh theih nan theihtawpin hma an lak thu P&E Minister chuan sawiin, “Tuirini te pawh khuah theih turin bawhzui ngaite chak takin a bawhzui mek a ni. Power supply kan neih ang angte rualkhai thei ang bera hman a nih theih nan a thawktute pawhin hma an la a, Krismas leh Kumthar hunpui vuakvet ah pawh khan load shedding tih ngai lovin power kan hmang thei a, kan lawm hle a ni. ZPM hina kan policy-ah hian hmasawnna ngelnghet zawk kan neh theih nan tui, eng leh kawng tha zawk kan neih theih nan hma kan la chho zel a ni,” a ti bawk.

132kV Line Sihhmui to Zuangtui via Luangmual Sub-Station hawnna hi 132kV Sub-Station, Zuangtui Control Room-ah neih niin 132kV (Sihmui to Zuangtui) line thar hian Mizoram-a 132kV Sub-Station lian pathum - Zuangtui, Luangmual leh Sihhmui te a thlun zawm vek avângin he'ng Sub-Station te hian line chhiat leh maintenance avânga shutdown lâk a tûl châng pawhin Power lâkluhna line dang an neih tâk vek avâng hian power supply khaihlak lovin kan neih tluan theih phah dâwn a ni. 

2x10MVA, 33/11kV Chite Sub-Station hawnna hi Chite Sub-Station ah neih a ni thung a, Chite Sub-Station hi Ministry of DoNER hnuaia North Eastern Special Infrastructure Development Scheme (NESIDS) atangin thawh a ni a, hemi atana senso Rs. 10,28,57,992 hi DoNER in a tum vek a ni. He Sub-Station-ah hian 10MVA, 33/11kV Transformer 2 (pahnih) dah a ni a, Zuangtui leh Mualpui Sub-Station atangin power a lalut thei a, 33kV Level-a power pêkchhuah theihna (Outgoing bays) pahnih a nei bawk a, heng te hi Zokhawsang-a Assam Rifles hmun leh RIPAN Zemabawk-a Power pêkchhuah nâna hman theih dawn a ni.