Football zirna pahnih tih changtlun tum a ni

Sports Minister Lalnghinglova Hmar chuan an Department-in a enkawl Football zirna te tihchangtlun tum a nih thu House a hrilh.

Nimin-a Assembly thutkhawm ah ZPM Member V. Malsawmtluanga zawhna chhangin Sports Minister chuan an Department hnuaiah Football zirna chu Saidan, Kolasib leh Lunglei-ah a awm thu sawiin, “Tihchangtlun tumin investor ni thei leh partner tur hmun hrang hrangah zawn mek a ni. Indawrna pawh thui tak kalpui a ni tawh. Hmun khat chauh an duh a, keini'n a pahniha enkawl kawp tur kan duh thung,” a ti a. Saidan-a Football zirna chu kum 17 hnuailam tan niin, Lunglei a mi chu kum 19 hnuailam tan tih niin mi 25 ve ve zir theihna tura tih thin chu tunhnaiah mi 30 zir theih tura tih len a nih thu a sawi bawk.

Sports Minister chuan zawhna dang chhangin, sawrkar Flagship Scheme 'Bana Kaih' hnuaia Empowering Mizoram Sports chuan Mizoram pum a huam dawn tih a sawi a, “Ruahman lawk dan chuan State pawnte nen inthlunzawmin, kan Coach-te training an pe ang. Chumi hnuah talent identification kan ti ang,” a ti a. PPP Mode anga kal a nih dawn thu sawiin, “Khawtlang nen tanghoin hmalak tur a ni,” a ti a, sum te pawh CSR atanga hmuh a nih tawh thu a sawi bawk.