Agriculture Minister in an intiam ang ngeiin Sawhthing an lei thu a sawi

Agriculture Minister PC. Vanlalruata chuan India ramah Sawh-thing rate tha lo mah se kut hnathawktute'n hralh an duh tawh avangin an intiam ang ngeiin sawrkarin Sawhthing a lei thu a sawi.

Nimin-a Assembly thutkhawm ah INC Member C. Ngunlianchunga zawhna chhangin Agriculture Minister chuan, “Tunah chuan Sawhthing hi a Grade-a then tumna a awm rih lo. Chhungkhaw khat atanga lei tur bithliah a awm lo a, February 20 atanga June 2025 thleng kan lei ang kan tih pawh, lei hun chhung tur hi bituk a awm lo. Kut hnathawktute tan thlaphanna tur a awm lo,” a ti. Agriculture Minister sawi danin, Sawhthing hi inbuatsaihna pakhatah chuan Secondary Collection Centre (SCC)-ah lilam a ni ang a, kg. khat Rs. 50-a chhangtu an awm loh chuan sawrkarin kg. khat Rs. 50 in a lak sang ang. Hei hi SCC mumal zawka kalpui a nih theih nana bultan chhungte, a man to zawka nawr a nih theih beiseinate leh kan tharchhuah tam thut avanga buaina awm thei venna atana hmalakna a ni.

Ruahmanna dangah chuan SCC-ah lilam a ni anga, kg. khat Rs. 50-a chhangtu an awm loh pawhin a chhang huai ber hnenah pek an ni anga. Rs. 50 a tlin lohna zawng zawng chu sawrkarin Support Price a pe anga. Sawrkarin Sawhthing man a tum chin tur hi kuthnathawktute hnenah Direct Benificiary Transfer hmanga pek tura ruahman a ni a. SCC-te hi Society hnuaia sumdawnna puitling kalpui thei tura thuiam chak a, helai hmun atanga hralhchhuah Sawhthing man hniam lutuk tur Support Price hmanga ven chu sawrkar tum dan a ni, a ti.

Agriculture Minister chuan India ramah Sawhthing rate a sang hlei thei lo tih sawiin, “Sawhthing man hi ngaihven reng a ni a, tunhnaiah tlemin a kang deuh a, Rs. 33/34 te a ni. Sawhthing man sang lo mah se, kuthnathawktute'n an Sawhthing hralh an duh tawh si avangin February 20 atangin sawrkar sumin kan lei ta phawt a ni,” a ti a.“Hmun danga Sawhthingte an lei zo thawkhat avangin a leitu turte pawhin Mizoram an rawn hawi tan nia an hriat thu sawiin, “Kut hnathawktute pawh lo hmanhmawh lo a, lo nghak hram hram turin kan inzirtir,” a ti a, tun dinhmun ah Sawhthing dahkhawlna te a khah rih viau thu a sawi bawk.

Agriculture Minister chuan Buffer Stock Point Sairang atangin Sawhthing metric ton 88 leh SCC atangin quintal 14,300 vel hralh chhuah tawh a nih thu sawiin, “Buffer Stock Point-ah hian Sawhthing quintal 1997 a awm mek a, kan in hralh thawl chho zel. SCC lam atang pawh kan hralh thawl chho tan mek a, nitin kan hralhchhuak,” a ti. Agriculture Minister chuan Kut hnathawktute chu kumdang anga an Sawhthing thar chhuahte an hralh chak theih loh avanga lo lungawi lo tura a duh thu leh an intiam anga an lei ngei dawn thu a sawi bawk a ni.