Chief Minister in kuthnathawktute an ngaihsak thu leh an intiam anga Sawhthing an lei thu a sawi

Nimin-a Mizoram Legislative Assembly Session-ah Chief Minister Lalduhoma chuan anni anga kuthnathawktu te ngaihsak an awm ngai loh thu sawiin, “Kan intiam ang ngeiin Sawhthing kan lei,” a ti a. Sawhthing atanga a tui lakchhuahna hmun (Oil Extraction) din chungchang a sawi chu buaipui zel a nih thu a sawi bawk.

Nimin-a Assembly Inkhawm ah Sawrkar in Sawhthing a lei chungchanga zawhna kal zelah INC Member C Ngunlianchunga'n danglam bik tur insawi an nih thu a sawi chhuah chungchangah Chief Minister chuan, “In danglam tur a ni in ti a, kan danglam der tawh. Keini anga kut hnathawktute ngaihsak tumah an awm lo. Tunhma in a man to zawka lei duh an awm pawhin an phal lo. Sundar Ali bakin a lei thei thin lo,” tiin a kaihhruai sawrkar chuan hun bituk pawh siam tawh lovin kut hnathawktute Sawhthing lei tur a awm chhung an lei dawn thu a sawi a ni.

Chief Minister chuan kum rei tak Sawhthing lei an aupui tawh tih sawiin, “An kawtkaia lei kan sawi ngai lo, tumahin an tlin pawh ka ring lo. Secondary Collection Centre (SCC) kan din a, kan intiam ang ngeiin kan lei. Kan intiam loh SCC-a phurh thlen man kan pe thei lo. Rs. 50 a SCC-a kan lei bakah ip kan pe a, ip pakhat hi Rs. 10 a ni a, Buffer Stock naa phurh thlen man leh buaipui man nen kg. khatah Rs. 70-80 vel kan seng,” a ti. SCC leh Buffer Stock Point-ah te Sawhthing a khah viau tawh thu pawh sawiin Chief Minister chuan, “Hralh thawl a nih phawt loh chuan a dahna kan nei lo. Kut hnathawktute pawh hmanhmawh lo turin ka chah duh. Kan hralh thawl mek a, a dahna a awm velah kan lei zel ang. Hmanhmawh a ngai lo, senso a tlem emaw, a tam emaw kan ngaihtuah lo, kan lei zel dawn,” a ti a, tunhnaia Sawhthing State pawna thawnchhuaha sawi awm chu fimkhurna atan hman a that thu a sawi bawk.

Chief Minister chuan Sawhthing atanga a tui lakchhuahna hmun (Oil Extraction) din chung-chang a sawi chu buaipui zel a nih thu sawiin, a dinna tur ram pawh Neihloh VC-te'n ram tha tak, zau tak a thlawnin an pe tih a sawi a, a buaipui chhung reiin harsa mah se buaipui mek a nih thu a sawi bawk.

Agriculture Minister PC. Vanlalruata pawhin Sawhthing sawngbawlna tur hi buaipui mek a nih thu sawiin, “Enterpreneur an ni a, an tum angin a awlsam bik lo. Loan te an lak a ngai a, an tum angin an kal chak thei lo. Sawrkar pawhin puih ve kan tum,” a ti a, Sawhthing sawngbawlna atan sawrkar chu a inhawn thu a sawi bawk.