ZORO leh Zirlai ten do tlan zel an tum thu an sawi

ZORO General Headquarters hruaitute leh Joint Hnampual Students’ Organisation thukhawm chuan sawrkar laipuiin Myanmar nen kan inkalpawhna 'Free Movement Regime' a thiat leh ramri hung a tum chu do tlan zel an rel.

Zirtawpni chawhnu khan ZORO General Headquarters hruaitute leh Joint Hnampual Students’ Organisation Aizawl te chu ZORO Office-ah Free Movement Regime (FMR) thiah chungchang leh India sawrkarin Indo-Myanmar border hung a tum chungchang sawihona an nei a, he hun hi ZORO General Secretary L. Ramdinliana Renthlei chuan kaihruaiin, “Free Movement Regime thiah leh Border Fencing hian kan hnam inpumkhatna a tichhe nasa dawn hle a, hei hi kan hnam tan a pawi hle dawn a ni. Border fencing anih chuan nasa takin ram kan chan dawn a, kan eizawnna te, kan leilet te kan chan dawn a ni. India sawrkar hian Zofate hi min danchep a tumna hmanraw pakhat a ni a, UNO-in kan dikna chanvo min pek hi humhim turin theihtawp kan chhuah a ngai a ni,” a ti.

ZORO General Headquarters hruaitute leh Joint Hnampual Students’ Organisation Aizawl hruaitute meeting chuan hemi chungchanga ZORO hmalakna hi tha an tih thu sawiin, “A theih ang anga hmalakho zel nise” an ti a ni. Hnampual Students’ Organisation Aizawl hi Mara Students’ Organisation, Lai Students’ Association, Ranglong Students’ Union, Siamsinpawlpi, Pang Zirlai Pawl, Mizoram Bawm Student’s Association leh Hmar Students’ Association te inzawmkhawm an ni.