Mizoram-a Lung In-a tang mi 1624 an awm mek

Mizoram-a Prisons Department hnuaia Tan In hrang hrang, mi 1,386 awm theihna ah mi 1,624 an tang mek a, awm thei zata hisap aiin mi 238 in an tam a ni.

Inrinni-a Prisons Department in an tarlan danin Aizawl-a Central Jail leh Central Women Jail chu tang awm tura hisap aia an tam zualna a ni a. Central Jail-ah hian mi 438 tang thei tura hisap a nih laiin mi 827 an tang a, Central Women Jail-ah chuan mi 96 tang thei tura hisap an nih laiin mi 120 leh an nu ten an hruailuh naupang 5 an awm mek a. District Jail Aizawl, Lunglei leh Champhai-ah te tang thei tura hisap aia tam an tang bawk a ni.

Tunah hian Mizoram puma Jail hrang hrangah thubuai ngaihtuah lai tang mipa 893 leh hmeichhia 137, damchhung tang tur mipa 55, hrehawm taka lung In tang tura tih (Rigorous Imprisonment) mipa 316 leh hmeichhia 26, Tang pangngai (simple imprisonment) mipa 184 leh hmeichhia 5, an vaiin mipa 1448 leh hmeichhia 168, bakah an nu ten an hruai loh theih loh naupang 8 an awm mek a ni. 

Prisons Department hotute chuan SASCI hnuaiah Mizoram Jail hrang hrang thawmthat nan cheng vbc. 55 an neih thu sawiin, District tharah pawh hma lak zel a nih thu an sawi a. Khawzawl-ah District Jail tur ram neiin Saitual-ah Jail sak tawh a nih thu leh Hnahthial-ah pawh ram an neih fel tawh thu an sawi bawk a ni.