Chief Minister in Sericilture pawimawh ti

Chief Minister Lalduhoma chuan Sericulture chu Mizoram ei leh bar chawikan nana hmanraw tangkai ber a nih thei thu a sawi.

Chief Minister Lalduhoma leh Sericulture changtu Minister Lalthansanga te hian Inrinni khan Zemabawk North-a Sericulture Complex chu tlawhin, hnathawh mek leh hmalak zel dan tur te an enpui a. He hunah hian Chief Minister Lalduhoma chuan Sericulture chu Mizoram ei leh bar chawikan nana hmanraw tangkai ber an nih theih thu sawiin, Sawrkar Laipui pawhin a ngaih pawimawh thu a sawi a. Project engemawzat bawhzui tura ruahmanna neih mek a nih thu a sawi bawk.

Chief Minister chuan mipui ten Sericulture hmanga eizawn an uar theih nan tun aia nasa leh zuala inhrilhhriat a tul thu sawiin, thawktute pawh tan la leh zual turin a chah a, sawrkar hnathawkte chu sawrkar kut leh ke ber an nih avangin inthlahdah a thiang lo tih a sawi . 

Sericulture Department Minister Lalthansanga pawhin thu sawiin Sericulture Department hmalakna leh hmachhawp hrang hrangte thawktute nen uluk taka an enho thin thu leh hmachhawp lian tak tak an neih mek thu a sawi a. Sericulture chu eizawnna tlak a nih thu te leh Pangang chaw tha ber ber te chu Mizoram-ah a that duh avangin Mizo mipui te chu an vanneih thu a sawi bawk.