Vote tla 90% tlin tum a ni

Tun thla ni 12-a Village Council Inthlanpui lo awm turah Serchhip District-a Vote tla chu za zela 90 a tlin theihna turin tanlak a ni dawn.
Kum 2020-a Village Council Inthlanpui neih a nih khan Serchhip District-ah Vote nei atanga chhutin za zela 80.6 te chuan Vote thlakin kumin hian Vote nei zinga za zela 90 ten Vote an thlak theihna turin tanlak a ni dawn a, hemi chungchang hi Zirtawpni khan Serchhip District Election Officer Paul L. Khuma hoin Serchhip DC Meeting Hall-ah sawiho a ni a. Hmalakna tur hrang hrang sawiho niin Ser-chhip DEO chuan chhungtinte hnenah vote thlak tura ngenna lehkha a thawn dawn a. Serchhip District a vote nei, zirna leh thil dang vanga District pawna awm te pawh Social Media kaltlanga lehkha thawnin, Vote thlak turin a sawm dawn a. Heng sawmna te hi a dawng tur ten an dawn ngei theih nan YMA, MHIP leh MJA ten an tanpui dawn a ni.

Heng bakah hian MPF te chu kum upate leh harsatna dang vanga Polling Station thleng theilo te tanpui tura ngen an ni a. Polling Booth pathum thlang chhuakin Govt. Serchhip College Electoral Literacy Club te chuan Help Desk an siam dawn a. Vote thlak chungchanga zawhna leh hriat duh nei te an tanpui dawn a ni.

Social Media kaltlangin ni tin e-flyer siamin vote thlak tura inzirtirna slogan hrang hrang thehdarh ni dawn a. Sector Magistrate te leh VLO ten an bial theuhah Intense Monitoring Team an din ang a, inelna thianghlim an neih theih nan Best Voter Turnout Award siam a ni dawn a. Polling Station tinah Booth Ambassodor siamin Self Help Group ten Mizo hnam incheia incheiin vote thlak turin mipuite an sawm bawk ang.

He hmalakna hnuaiah hian Serchhip Field Veng chu Queue Less Polling Station atan thlan a ni a. Rei tak tak vote thlak tura intlar leh nghah ngai lovin chhungtin ten vote an thlak hun tur hun bi siam sak an ni dawn a. YMA te tanpuinain Poll Day hmain chhungtinte an hriattir dawn a ni. 

Comments