Mizoram-a Catholic kum 100 tlinna Serchhip-ah lawm

Mizoram-a Roman Catholic Kohhran in kum 100 a tlin lawmna chu February 1, 2025 khan a hawnna neih a ni a, Serchhip-ah pawh nimin khan Centenary lawmna hawnna hun hman a ni.
Catholic Kohhran in Mizoram-a kum 100 a tlin lawmna hi Serchhip-ah chuan nimin khan P&E Veng-a Our Lady of Assumption Catholic Church-ah neih a ni a, zing dar 8:30-ah Rosary Inkhawm neiin zing dar 9:30-ah Centenary dar vawi 100 vuak a ni a, hemi hnu hian inkhawmna neih zui a ni bawk a. Hetiang bawk hian Roman Catholic Kohhran dinna hmun hrang hrangah pawh an kum 100 tlin lawmna hi neih chhoh mek a ni bawk.

Catholic Kohhran hi February ni 1, 1925-ah mi panga- Lianchheua, Thangphunga, Lênga, Chalchhuna leh Lalbâna, Tlângnuam mi vek ten Catholic Kohhran chanchin an chhiar atanga Catholic rinna vuanin an din a, kum 1927 February thla ah Biak In hmasa ber sa zovin ‘Christ the King Church, Kulikawn’ tih a lo ni ta a ni. Kum 1947 atangin Mizoram-ah thu nghetin kum 1996 atangin Aizawl-ah Bishop in a thutchilh a, ‘Diocese of Aizawl’ tih a ni ta a ni.

Mizoram-a Catholic lo luh kum 100 tlin lawmna hi kum khat chhung neih tura ruahman niin Inrinni khan Christ the King Cathedral, Kuli-kawn-ah a hawnna neih a ni a, Centenary Dar vawi 100 vuak a ni a. Jubilee Kawngkapui hawnna, Jubilee Logo tlangzarhna leh Jubilee Bati chhitna hun Most. Rev. Stephen Rotluanga, Aizawl Bishop chuan hmangin Centenary Hlapui rem ani bawk.

Comments