Electronic device leh Social Media-a hmasawnna thleng mek hmang tangkai turin Journalist te chah

Serchhip District Bawrhsap Paul L. Khuma chuan Electronic device leh Social Media-a hmasawnna thleng mek chu hmang tangkai turin Journalist te a chah.
Serchhip District MJA ten Zirtawpni kalta, January 31, 2025-a MJA (SD) Annual Conference vawi 25-na Serchhip Press Club-a an hman a hmanpuina ah Bawrhsap chuan tunlai khawvelah Electronic device leh Social Media revolution a thleng mek tih sawiin, he thil thar hi thinhrik mai loa hmang tangkai turin a chah a. Khawvel changkang zel mila inherrem thiam mi ni turin Journalist te chu a fuih a. Journalist te chu awn lam nei loa thuziak thin turin a chah a; a hun laia ri hluai buaipui a, a laklawha tawpsan mai loin, an thuziah te a chhiartu mipui tana tangkai zawkna turin a tawp thlenga chhuizui peih thin turin a chah a ni. District Bawrhsap chuan Serchhip District MJA te leh District Administration in thawhhona tha tak an nei chu lawmawm a tih thu leh inzahtawn leh induhsaktawn takin tun thlengin an thawk ho nia a hriat thu a sawi bawk a ni.

MJA (SD) Annual Conference-ah hian khual zahawm, Serchhip DIPRO leh I&PR Deputy Director Lalnunmawii pawhin information dik leh belhchiandawl pekchhuah chu Journalist te mawhphurhna a ni tih sawiin, Mipui sawrkar, democracy-ah chuan ram hruaitute khalh ngiltu pawimawh tak an ni tih inhria a taima lehzual turin MJA Member te chu a chah bawk a ni.

Serchhip District MJA Annual Conference hi Vice President Kapliana Pachuau chuan kaihruaiin MJA General Hqrs. atangin Vice President C. Lalhmachhuana leh MJA (SD) President C. Lalhminghlua te pawhin thu an sawi a, Mizoram sawrkar in Journalist pension Scheme a siam thar hnuaia an Member atanga Pension-a chhuak RC. Hranghmingthanga (Zawlbuk Aw, Thenzawl) thlahna hun hmang nghalin Report hrang hrang ngaihthlak a ni bawk.

MJA Serchhip District-ah hian tun dinhmunah member 14 awm mekin, Member 10 te hi Serchhip khawpui ami te niin midang 4 te hi Thenzawl-a awm an ni thung a, Chanchinbu (Newspaper)-a thawk mi 11 leh Visual Media-a thawk mi pathum an awm mek a. Annual Conference-ah hian chawhnu lamah rorelna neiin kumin October thla a MJA (SD) kum 25 tlinna, Silver Jubilee chu ropui taka lawmna neih tum nise an ti bawk a. Hmeichhia te dikna leh chanvo humhalh chungchang zirhona hun an hmang nghal bawk a ni.