Vairengte - Aizawl Four Lane atan hma la tih sawi

Chief Minister Lalduhoma’n Vairengte leh Aizawl inkar kawng Four Lane laih meka zangnadawmna lama harsatna avanga hna chawlhsan tawh chu Sawrkar laipuiin zangnadawmna pek a remtih avangin Package V leh VII chu thla hmasa atang khan chhunzawm leh a nih thu a sawi.

Chief Minister hian a Instagram account kaltlanga he thu hi sawiin, Vairengte – Aizawl Four Lane laih meka zangnadawmna lama harsatna avanga hna chawlhsan tawh chu a thawktute pawhin inhnuhdawh san mai an duh tawh tih a sawi a. Nikum October thlaa Highway Review Meeting-a an dil angin Sawrkar laipui chuan zangnadawmna chu pek a remti tih sawiin, thla hmasa atangin Package V leh VII-ah hmalak chhunzawm a ni tawh tih a sawi a ni.

Chief Minister Lalduhoma hian nikum October ni 26-a CMO Conference Hall-a Press Conference a neihna ah Vairengte leh Sairang inkar kawngpui thlur li (4)-a laihna tura ram neitute hnena zangnadawmna pek tur tihfel anih thu hi a lo sawi tawh a, Chief Minister sawi danin rei tak Forest Clearance felloh avanga thawh theihloh chu Road Transport & Highways Minister Nitin Gadkari hnenah a ngenna angin chinfel dan an ngaihtuah tih sawiin, Forest Department leh ram neitute tanna chu a dik ve ve avangin an pahniha zangnadawmna pe turin a ngen tih a sawi a, hemi ang hian an pahnihin an hmu ve ve thei dawn a, Forest Department in cheng vbc. 90 leh ram neitute tan cheng vbc. 1100 vel dah a ni tih a sawi a ni.