Mizoram-a PACS te dinhmun enfiah mek a ni

Tunlai hian Primary Agriculture Credit Society (PACS) dinhmun enfiahin Mizoram hmun hrang hrangah Resource Person te an kal kual mek.

Apex Bank hnuaia awm PACS Development Cell leh Bussiness Diversification & Product Innovative Cell (BDPI)-a Resource Person Lalhruaichhungi sawi danin Mizoram-ah PACS 90 din a ni tawh a, heng zinga Society 25 chu tun dinhmunah a tha a ngaih niin PACS hi pawisa dah that nan leh loan pek nan a tangkai a, thingtlang khuaa awm te tan awlsam takin sum sen ngai lova din theih a ni a, kuthnathawk leh sumdawnna khawihtute tan a tangkai takzet tih a sawi a ni. 

Lalhruaichhungi chuan PACS chuan loan a pekchhuah bakah sumdawnna kawng hrang hrang an khawih thei tih pawh sawiin, FCS&CA Department hnuaiah buhfai sem, Retailer chenin an khawih thei tih a sawi a, Society member leh mipui tan tangkai takin hna an thawk thei tih sawiin, mi tam takin an hman tangkai tawh thu a sawi bawk a, intodelh nan India sawrkar in a ngaih pawimawh avangin mipui ten PACS chu din uar a hmang tangkai zel turin a duh tih a sawi bawk.