Assembly Budget Session lo awm turah Mizoram State University dinna tur bill pharh hman tum a ni

Mizoram State University dinna tur Bill chu buaipui mek a ni a, tun thla a Assembly Budget Session-ah hian sawiho tura pharh hman tum a ni.

Higher & Technical Education Department changtu Commissioner and Secretary H. Lalengmawia chuan Pachhunga University College-a Mizo Department in ‘Thangliana Kutchhuak leh Sulhnu Zir Chianna’ (National Seminar on Thomas Herbert Lewin’s Legacy and Contributions to Mizo Literature) hawnna nimin-a neih a hmanpuina ah hemi chungchang hi sawiin, NEP 2020 chuan kum 2035 hnu lamah chuan Affiliated College awm phal a nih dawn tawh loh avangin, tuna Mizoram University hnuaia College te an awm ang hian an awm thei tawh dawn lo tih a sawi a. “State sawrkar chuan sum harsa chung chung pawhin State University din turin ruahmanna a siam mek a, a Bill pawh peih a ni tawh a ni,” a ti a. State University hi a hautak lo thei ang berin, Clustered University-a din tum a nih thu a sawi a. College leh Institution hrang hrang te chu hman tangkai tum a nih thu a sawi bawk.

PUC Golden Jubilee Hall-a National Seminar buatsaihah hian Higher & Technical Education Department changtu Commissioner and Secretary H. Lalengmawia chuan, Thangliana chanchin leh a hnathawh chu zirchian tham leh zirchian tlak a nih thu a sawi a. Mizo hnam kha a hmangaih tak tak nge ‘diplomacy’ a thiam vang tih te leh Mizo nula Dari nupui-a a neih pawh Mizo a hmangaih vang nge, Mizo Cociety-a tlaktlum a duh vang tih te pawh zirchian tham a nih thu a sawi tel bawk.

Thangliana (Thomas Herbert Lewin) hi Mizo hawrawpa thuziak hmasa ber, ziaka Mizo chanchin dah hmasa leh English-a Mizo thawnthu lo dah hmasa ber nia a hriat a ni a. Vailen vawikhatna (The Lushai Expedition 1871-1872)-a Zoluti (Mary Winchester) lalettu, Mizo te thian tha, kum 1872-a Mizo lal 7 leh an thuihhruai mi 27 te Kolkatta-a zinpuitu a ni bawk. Mizo nula Dari chu nupui-ah a nei a, Mizoram tihmasawn turin ruahmanna tam tak lo siamtu a ni bawk. A chanchin hi lehkhabu engemaw zatah ziah leh tarlan a ni tawh a, ama pual Seminar erawh a vawikhatna nia hriat a ni.

Thangliana Kutchhuak leh Sulhnu Zirchianna Seminar hawnna inkhawm hi Enid H. Lalrammuani, Asst. Professor chuan a kaihruai a. Dr. H. Laldinmawia, HoD (UG&PG), Department of Mizo chuan inlawmna thu a sawi a, Dr. Lalrammuana Sailo, Seminar Coordinator chuan Thangliana chanchin tlangpui a sawi a. He Seminar-ah hian Mizoram chhung leh pawna mithiam tak tak mi 30 dawn laiin paper an present dawn a, Vawiin ah chhunzawm a ni ang.