Tun thla ni 20 atangin Sawhthing hralh tum niin Market lamah hma an sawn zel tih an sawi

Chief Minister Lalduhoma chuan tun thla, February ni 20 atangin Secondary Collection Centre (SCC) cum Auction Centres-ah Sawhthing hralhchhuah runpui tan a ni dawn tih a sawi a, Adviser to CM (Implementation of Handholding Policy) Dr. KC. Lalmalsawmzauva chuan Market lamah nasa taka hma an sawn thu a sawi bawk.

He thu hi Social Media, Instagram kaltlanga tarlangin Chief Minister chuan sawiin, he hunah hian Sawhthing a sumdawngte tel vek turin an sawm tih a sawi a, Auction chu Rs. 50 atanga tan tur a ni tih sawiin, District Agricultural Marketing Committee (DAMC) te leh Coordinator bakah SCC a duty ten a tul angin an buaipui dawn tih a sawi bawk.

Kumin February ni 20 atanga Sawhthing lei tan tur chungchang hi Agriculture Minister PC. Vanlalruata chuan January thla a chanchinbumite a kawmna ah a lo sawi tawh a, Minister chuan sawrkarin Agricultural Market Assurance Schemes hnuaia sawrkarin rate tur a tihchhuah tawh angin Sawhthing chu kg-ah Rs. 50/- a lei a ni dawn tih a sawi a. Mizoram puma khaw hrang hrangah Society 675-a awm tawh thu sawiin, heng Society te hian District hrang hranga sawrkarin a ruahman Sawhthing lakkhawma leina tur, Secondary Collection Centre 54-ah an phurhkhawm dawn tih a sawi a, District tina District Agriculture Marketing Committee in an lo buaipui dawn tih a sawi bawk a ni.

Adviser to Chief Minister (Implementation of Handholding Policy) Dr. KC. Lalmal-sawmzauva chuan Mizoram sawrkar-in thlai 4 lei tur a thlante theihtawp chhuahin a Market lamah hma an lak zel thu sawiin, za-ah za hlawhtling nghal lo mah se nasa takin hma an sawn tih a sawi a. Sawhthing lei tur ten a hlawma leina mai tur an hre thin lova, Sawhthing thar teuh siin Mizoram khaw hrang hrangah an vahkual a ngai thin a, chuvangin Sawrkar chuan a hralhna hmunpui, Secondary Collection Centre chu hmun 66 lai ruahman a nih thu a sawi a ni. Tun thla ni 20 atangin heng SCC-cum-Auction Centres-ah te hian Sawh-thing Auction runpui (Rs.50/- atanga tan tur) neih a ni anga. Kum 5 a vei meuh chuan heng SCC te hi mumal zawkin an kal theih tawh turah beisei a nih thu a sawi bawk.