Assembly Session atan zawhna 828 a lut tawh

February 19 atanga March 20, 2025 inkar chhunga Mizoram Legislative Assembly Budget Session neih turah Zirtawpni thleng khan House a chhan turin zawhna 828 a lut tawh.

Aseembly Secretariat thawktute sawi danin Zirtawpni kalta thleng khan House-a ziaka chhan chi zawhna ‘Starred question’ 740 leh ziak chhan chi zawhna ‘Unstarred question’ 88 a lut tawh a. Zawhna hi March 4, 2025 thleng a Department azirin thehluh theih a ni a. Heng bakah hian Bill pathum lut tawhin chungte chu LESDE Department atanga lut ‘Private Placement Agency Regulation bill, 2025’; UD&PA Department atanga lut ‘The Mizoram Urban & Regional Development Bill, 2025’ leh Finance Department atanga lut ‘Goods & Services Tax (1st Amendment (Bill), 2025 te an ni a. Hei bakah hian Paper Lay tur pathum, Private Member Resolution 25 leh Forest Department atanga lut Official Resolution pakhat a awm bawk.

Assembly Speaker Lalbiakzama hova Bussiness Advisory Committee in ruahmanna an siam dan chuan Session tan ni hian Mizoram Larsap in House-ah thu a sawi ang a. February 21-ah sunna hun hman tur a niin hriat theih chinah sun tur hi pakhat, Prime Minister hlui, Dr. Manmohan Singh a awm a. March 4-ah Chief Minister leh Finance changtu Lalduhoma chuan kum 2025-2026 Mizoram Budget leh kum 2024-25 sum dil belhna, Supplementary Demand a pharh anga. March 12 atangin Minister hrang hrangte demand sawi hova pass nghal zel tum a ni ang.