Serchhip District-a VC Inthlan thlirletna neiin Sector Officer leh VLO hnathawk tha lawmpui an ni
Tun thla ni 12-a Serchhip District-a Village Council Inthlanpui neih zawh tak thlirletna hun Serchhip DC Meeting Hall-a neih ah hian District Bawrhsap leh District Election Officer Paul L. Khuma chuan harsatna leh buaina lian tham engmah awm lo a inthlan tluang taka neih a nih avangin lawmawm a tih thu a sawi a. He inthlanna a mawhphurhna nei zawng zawng ten an tih tur tha takin an hlen vek nia a hriat thu sawiin, Election a duty zawng zawng te chungah lawmthu a sawi a ni.
He hunah hian Sector Officer te leh Nodal Officer ten inthlana an thil hmuh leh hriat atanga an zir chhuah te, Election a awm leh hun atana thil tha zawk nia an hriat te, mipuiin vote thlak an ngaih pawimawh lehzual theihna tur leh felfai zawka ruahmanna siam theih dan nia an hriat te an sawi a. An tawn hriat atanga an thil zirchhuah te hi uluk taka vawn that a nih tur thu DEO chuan a sawi a. Election lo la awm leh zel turah mawhphurhna la tu ten tangkai taka an hman theih turin document felfai taka siam a nih tur thu a sawi a ni.
VC Inthlan thlirletna hunah hian Election Officer F.Lalnisai chuan Village Council inthlan atana DEO Office inbuatsaihna te, training an kalpui dan te, Sector Officer an inruat dan te bakah inthlan ni leh vote chhiar zana hun an hman dan report kimchang takin a pe bawk a ni.
Kumin-a Village Council inthlanah khan vote tla a that theihna turin Village Level Officer (VLO) te leh Sector Officer te tan inelna siam a ni a, tun tum Election-ah hian Serchhip District chu Sector pariat (8)-ah then niin Sector tinah hian voter tam dan a zirin khua leh veng engemaw zat dahkhawm a ni a. Heng Sector te hi a viltu turin Sector Officer ruat an ni a, Magisterial Power pek theuh an ni bawk.
Vote tla a that theihna turin anmahni Sector theuh vil uluk tur leh enzui (monitor) tura tih an ni a, an hmalakna atangin nimin khan hna thawk tha thlanchhuah te hnenah lawmpuina hlan niin Sector pariat zingah Serchhip Vengchung, Chhim Veng, Field Veng leh Hmar Veng te chuan ti tha berin vote hi 82.43% a tla a. A bialtu Sector Officer Gaston Vanlalhriatpuia hnenah lawmpuina thuziak leh pawisafai DC hian a hlan a ni.
Village Level Officer te zingah voter tam dan a zirin Category 3-a thenin inelna siam a ni bawk a. Category-I, voter 1200 chin chunglam awmna ah Serchhip Vengchung-ah vote 84.13% tlain an ti tha ber a, VLO Vanlalruata hnenah lawmpuina hlan a ni a, Category-II, voter 600 atanga 1200 awmna ah lawmpuina dawngtu chu Lalchhuana, Darnam VLO niin Darnam-ah hian Vote 83.36% a tla a. Category-III ah voter 600 hnuailam awmin lawmpuina dawngtu chu Buangpui VLO C. Lalramthara a ni a, Buangpuiah hian vote 90.12% a tla a ni.
Heng bakah hian Serchhip Sub-Headquarters YMA, Serchhip Sub-Headquarters MHIP, Mizoram People Forum (MPF), Government Serchhip College Electoral Literacy Club te leh Serchhip District MJA te hnenah lawmthu sawina sumfai hlan a ni bawk a. Vote tla a that theihna turin heng pawl hrang hrang te hian District Election Office theihtawp chhuahin an thawhpui a. Mahni Veng leh khua ah te In tinah kalin vote thlak theuh turin mipui an sawm bakah vote thlak ni ah voter te tanpui turin nilengin MPF te leh ELC te hi an duty a ni.
Nimin-a he hun hman ah hian Addl. DC leh Deputy DEO Lalrinzuala bakah Sector Officer te leh Nodal Officer te bakah heng pawl hrang hrang aiawhte hi an tel a ni.