Tun thla chhung awh tur ‘Road Safety Month’ hawn a ni

Sawrkar laipui ruahman angin thla khat chhung awh tur, kawngpui-a lirthei leh mipuite himna tura inzirtirna, Road Safety Month chu Inrinni, February 1, 2025 khan Mizoram puma hman turin Aizawl-ah hawn a ni a, District hrang hrangah pawh hman chhunzawm nghal a ni bawk.

Sawrkar laipui Ministry of Road Transport & Highways-in State tin te Road Safety Month hmang tura a tih angin Mizoram-ah pawh Road Safety Month hi Inrinni khan Transport Department Conference Hall-ah a hawnna hun hman a ni a, he huna thu sawitu, Transport Department Secretary Zosangliana chuan sawrkarin Road Safety Month hman dan tur tam tak a duang tih sawiin, February thla chhung hian lirthei endik beihpui thlak a nih tur thu leh Mizoram pumah Surprise Checking neih a nih dawn thu a sawi a, lirthei neitute nasa lehzuala an fimkhur a tul dawn thu a sawi a ni.

Transport Department Secretary tarlan danin, kum 5 kalta chhungin Police ten Mizoram-ah lirtheia chetsualna vawi 492 an chhinchhiah a, hetah hian mi 423 in nunna an chan bakah na taka hliam tuar mi 185 an awm a, chetsualna tam ber chu lirthei khalhtute fimkhur loh vanga thleng a nih thu sawiin, lirthei chetsualna thlenga za zela 75 chu lirthei khalhtute fimkhur loh avanga thleng a ni a, hei vang hian lirthei khalhtute fimkhur lehzual a tul thu a sawi bawk.

He hunah hian Transport Department Director Er. Lalrammawia pawhin Mizoram puma lirthei register, 3,20,000 vel a awm thu leh heng zinga lirthei 80,000 chuang chu document nung famkimlo a nih thu a sawi a, Road Safety Month chhungin lirthei fitness check uluk zual tura hmalak a nih tur thu leh lirthei chetsualna tiziaawm turin kawng hrang hrangin mipui zirtirna kalpui tum a nih thu a sawi bawk.