System thar, mipui tana tha zawk si kan duh; Hmasawnna hmel thar hmuh thuai thuai kan duh - Chief Minister

Chief Minister Lalduhoma chuan System thar, mipui tana tha zawk si an duh thu sawiin, “Kan sawrkar ah hian sawrkar hnathawkte chu fel sawt tura beisei in ni a, kan hnathawh pawh a tha ngei ngei tur a ni. Hmasawnna hmel thar hmuh thuai thuai kan duh,” a ti.

Zirtawpni kalta khan Aizawl-a Secretariat Conference Hall-ah Minister F. Rodingliana enkawl Department P&E, Commerce & Industries leh Printing and Stationery te hnathawh dan enpui-a Meeting neih a hmanpuina ah Chief Minister Lalduhoma chuan Department hrang hrangte chu Service Review Committee din vek tura an tih thu leh chhawr tlak loh hnathawktute chu pension tha tawk tak nena chawlhtir a, chhawr tlak hnathawktu lak mai tha an tih thu a sawi a, hun vawng dik turin sawrkar hnathawkte an phut thu sawiin, chhiatni thatni-a Office ruak huai khawpa an chhuak dual thin pawh tih tawh loh an duh thu leh lam hla zawk atanga Office dawrtute tan a beidawnthlak thin tih a sawi a. “Manpower indaih lehzuala kan awm theih nan e-office uar deuh deuh kan tum,” a ti.

Chief Minister chuan System thar, mipui tana tha zawk si an duh thu sawiin, “Chu kalphung chuan kan dinhmun luah mek pawh a lo tihliau palh thei. Mi tlem te hamthatna aiin mipui hamthatna kha kan rilru-ah a lal zawk zel,” a ti a, “Department tina Officer ten in hnuaia hna hniam zawk thawkte in ngaihtuah tha tawk lo niin a lang thin. Officer post chu kan hnawhkhat zung zung fo a, a hnuai lam erawh a lo kawrawng thin hle. Lu lian pui, ke lam tla bal tak angin kan awm a ni. Hei hi a tha lo hle a, hna hniam lam lo ngaihthah suh u,” tiin a chah a, “Kan sawrkarah hian sawrkar hnathawkte chu fel sawt tura beisei in ni a, kan hnathawh pawh a tha ngei ngei tur a ni. Hmasawnna hmel thar hmuh thuai thuai kan duh a, kan tangin kan fir hle,” tiin chhungkua leh laina induhsakna uchuak awm thin tihtawp nan Integrity Pack hi khauh takin an kengkawh dawn tih a sawi bawk.

Department thenkhatin Bank hrang hrang an dawr chuan harsatna a siam tih pawh Chief Minister chuan sawiin, “Sum leh pai enkawlna kawngah thil rinhlelhawm a siam. Chuvang chuan One Department One Bank System kalpui kan tum,” a ti a, Factory-ah bungraw mamawh direct-a an lei a, sum leh pai tlem zawk senga hmalakna tam zawk an neih theih dan tur an dap mek thu a sawi bawk a. Sawrkar hnathawk te tel lovin engmah an ti thei lo tih Chief Minister chuan sawiin, “Sawrkar hnathawk ten phur taka hna in thawh chuan kan ram hian mathei lovin hma a sawn sawn a ni,” a ti bawk.