Thu intiam tawn tih hlawhtlin loh vangin BJP sawrkar in ZPM sawrkar a hrek niin sawi
Mizoram Pradesh Congress Committee (MPCC) President Lal Thanzara chuan ZPM sawrkarin BJP an zawmna leh an thu intiam tawn ang an tih hlawhtlin loh avangin BJP sawrkar in a hrek niin a sawi.
Nimin-a Congress Party Kolasib Block-I ten Political Training leh mithar lawmluhna hun an buatsaih a hmanpuina ah MPCC President Lal Thanzara chuan ZPM sawrkarin BJP an zawmna leh an thu intiam tawn ang an tih hlawhtlin loh avangin BJP sawrkar in a hrek tih sawiin, “Central dawrtu CM leh Minister te thil hawn chu thlalak thar an neih belh chauh hi a ni. BJP duh anga an awm hma loh chuan engmah an ti thei dawn lova, BJP duh anga an awm hun hunah Kohhran rilru an hliam dawn avangin tunah hian tuilairapin ZPM sawrkar hi a awm mek a ni,” a ti.MPCC President Lal Thanzara chuan Politics chu rawngbawlna a nih thu leh dawt leh mahni inhaivurna tur a ni lo tih sawiin, “Party a kan awm chhan eng nge? Kan party awmnaah hian kan ram, kan hnam, kan sakhua a him em? tih kan ngaihtuah a tul. Congress Party hi India Zalenna sual chhuaktu, India rama hnam hrang hrang leh sakhaw hrang hrang him taka an awm theihna tura dan siamtu Party leh Sakhaw Zalenna kengtu a ni. Sum thianghlim lo nena lalna changa kan sakhaw Zalenna min palzut saktu te nena nghawngkawl inbah tawn hi Kristian te tan chuan a thiang lo a ni,” a ti bawk.
MPCC thuchhuah in a tarlan danin nimin-a he hun an hmanna ah hian ZPM, MNF leh Neutral atangin mithar 74 zet Congress party-ah an lawmlut a ni.
Comments
Post a Comment