Kum 5 chhungin Police-in thubuai 17,070 an ziahluh zingah rukruk kaihhnawih thubuai a tam
Mizoram Police chuan kum nga (5) kalta (2020-2025) chhungin thubuai 17,070 an ziaklut a, thubuai ziahluh zinga 13,675 hi IPC/BNS hmanga ziahluh niin a dang 3,395 chu Non-IPC/Local (Special Law) hnuaia ziahluh a ni.
Mizoram Police hian kum 2020-ah thubuai 2,317 ziaklutin heng zinga 1,804 hi IPC hnuaiah niin a dang 513 hi Non-IPC hnuaiah a ni a. Kum 2021-ah thubuai 3,198 ziaklutin hengte hi IPC hnuaiah 2,486 leh Non-IPC hnuaiah 712 a ni a. Kum 2022-ah thubuai 4,273 ziaklutin IPC hnuaiah 3,699 leh Non-IPC hnuaiah 574 a ni bawk a. Kum 2023-ah thubuai IPC hnuaiah 3,338 leh Non-IPC hnuaiah 763 ziaklutin hemi kum a thubuai ziahluh zawng zawng chu 4,101 a ni. Nikum chhung khan IPC/BNS hnuaiah thubuai 2,348 leh Special Law hnuaiah thubuai 833 ziaklutin nikum chhunga thubuai an ziahluh zawng zawng hi 3,181 a ni bawk.IPC bikah hian Police thubuai ziahluh zingah rukruk/mi rawk thubuai chu a tam lawr lak a. Kum nga kalta chhung hian rukruk/mi rawk thubuai hi 9,491 ziahluh niin hei hi kum nga chhunga IPC hnuaia thubuai ziahluh zawng zawng 13,675 atanga chhutin 69.40% a tling phak hial a. Case langsar ziahluh zingah tualthah case bikah kum 2020-ah Case 30 ziahluh niin kum 2021-ah 24, kum 2022-ah 31, kum 2023-ah 25 leh kum 2024-ah thubuai 24 ziahluh a ni a. Pawngsual thubuai hi kum 2020-ah 36 ziahluh niin kum 2021-ah 25, kum 2022-ah 16, kum 2023-ah 28 leh nikum 2024-ah thubuai 19 ziahluh a ni bawk. Tualthah tum thubuai pawh kum 2020-ah pakua ziahluh awmin kum 2021-ah 19, kum 2022-ah 19, kum 2023-ah 18 leh kum 2024-ah 18-te ziahluh a ni bawk.
Special Law/Non-IPC hnuaiah hian Zu khapna dan bawhchhiatna (Prohibition/MLPC Act) hnuaia thubuai ziahluh a tam ber a, kum nga kalta chhungin thubuai 1,328 ziahluh niin hei hi Non-IPC hnuaia thubuai ziahluh zawng zawng atanga chhutin 39.11% a tling a. Ruihhlo (damdawi) kaihhnawih thubuai ziahluh chu pahnihna niin ND&PS Act hnuaiah thubuai 1,086 ziahluh a ni a, hei hi thubuai ziahluh zawng zawng atangin 31.98% a tling a ni. Non-IPC hnuaia thubuai ziahluh zingah POCSO Case chu thubuai ziahluh tam lamah pathumna niin kum nga kalta chhungin POCSO Act hnuaiah thubuai 599 ziahluh a ni bawk.
Comments
Post a Comment