Serchhip District-a VC Inthlanna nei turin inbuatsaihna hrang hrang peihfel thawkhat tawh
Mizoram District 9-a Village Council leh Local Council Inthlanpui naktuk, Feb. 12, 2025-a neih tur atana inbuatsaihna chuan a vawrtawp a thleng ta a, he inthlanna neih tur atana Campaign theih hun chu nimin tlai dar 4:00 khan tawpin ‘Silent Period’ hman mek a ni a, ruahman lawk ang chuan naktuk Feb. 12, 2025 zing dar 7:00 atangin Polling Station hrang hrangah Vote thlak tan a ni anga, tlai dar 4:00 thleng Vote thlakna hun hawngin hemi hnu zan dar 7:00-ah Vote tla te hi chhiar tur a ni dawn a ni.
Serchhip District chhung Village Council hrang hranga inthlanna nei turin inbuatsaihna pawh peihfel thawkhat a ni tawh a, nimin tlai khan District Election Officer leh Bawrhsap Paul L. Khuma hovin a Pisa-ah inthlanna neih tur atana inbuatsaihna chu thlirho a ni a, he hunah hian Nodal Officer ten an chanpual theuha ruahmanna an siam te leh hma an lak tawh chin te an tarlang a. Sector Officer te pawhin Polling Station tin fang chhuak tawhin Assured Minimum Facility a awm kim em tih an endik bakah a tul angin ruahmanna an siam tawh a. Polling Station adopt tura tih an nih angin an Bial theuhah Polling Station pakhat theuh chu Model atan an adopt a. Hei bakah hian he inthlanna ah hian Vote tla za zela 90 a tlin theihna tura hma an lakna te pawh he hunah hian tarlan a ni bawk.
Tun tum inthlanna a duty tura ruat ten Postal Ballot hmangin tluang takin Vote an thlak zo tawh a. Serchhip District chhunga vote nei, Election duty tura ruat te zingah vote 122 tlain hei hi za zela tehin 100% a ni a. District pawn a vote nei mi 60 zingah 33 in vote an thlak bawk a ni.
Inthlan ni-a Polling Station tina duty tur Booth Ambassador atan Self Help Group member te ruat an ni a. Govt. Serchhip College-a Electoral Literacy Club te chuan Polling Station pathum - Little Flower Convent School Polling Station, P&E Veng; Govt. Middle School Polling Station, New Serchhip North leh Govt. PCR High School Polling Station, New Serchhip South ah an duty dawn a. Vote thih theih dan chungchang leh vote thlak dan tur voters-te an lo hrilh hre dawn a ni.
Hei bakah hian Vote chhiar a khaihlak loh nan power supply pek dan tur ruahmanna pawh siam a ni a. Power supply a khaihlak emaw harsatna a thlen palh emawa biak pawh theih tur Power & Electricity Department Staff te ruat vek an ni bawk.