Serchhip District Hospital Building sak mek leh Nursing School dinhmun MSPMC ten a hmunah an enfiah
Heng hmalakna te an tlawh hmaa Serchhip District Medical Superintendent (DMS) Pisa-a thawktute nen an inkawmna ah MSPMC Secretary Er. Lalthanzuala Ralte chuan sawrkar in sum tam tak senga project a kalpui mek bakah hma a lo lak tawhna te chu puitling ngei se an duh thu sawiin, chumi tura a laklawh a harsatna awm leh a nih tur ang la ni lo te chu engtin nge chhunzawm theih ni ang tih ngaihtuaha sawrkar hmalakna hrang hrang an enfiah thin thu a sawi a. Tun tumah hian Serchhip-a GNM School sak zawh tawh leh khum 100 awmna tur District Hospital sak hna bul tan mek tlawh tura rawn kal an nih thu a sawi a. He huna tel Health Department leh Serchhip khawtlang hruaitute chu heng hmalakna te hi an ta a ni tih hriaa a neitu nih thiam turin a chah a. Project tam tak hlawhchham leh zawhfel a nih hnu lawka chhe leh mai thin, hman zui tlak loh te a awm thu pawh sawiin, hei vang hian District Hospital sak hna thawktute pawh an hna te a nih tur ang taka hun bituk chhung ngeia thawh zawh ngei tum turin a chah a. Contractor te pawh neitu rilru pu a thahnem ngai taka thawk turin a chah bawk.
Khum 100 awmna tura ruahman District Hospital Serchhip hi Power Grid Corporation of India Ltd. (PGCIL) in CSR Fund an pek cheng vbc. 21 hmanga sak tum mek a ni a, March 24, 2024 khan hna hi thawh tan a ni a, tunah hian a hmun tur lai tawhin a ban khur 12 laiin ban 8 phun a ni tawh a. Hospital Building hi Block, A, B leh C-ah then niin CSR Fund hmuh hmang hian Block A sak tura ruahman phawt a ni a. Block A-ah hian Casualty leh OPD Department bakah khum 15 ve ve awmna tur Gynaecology Ward leh Pediatric Ward te awm tura ruahman a ni a. He Building sak hna hi Zamzo Engineering Construction & Consultancy, Bawngkawn, Aizawl ten an thawk a. An hmanraw hman te a nih tur ang tak hmang tur leh sawrkar in a sak hun tura a ruahman thla 24 chhunga sak zawh ngei tum turin MSPMC chuan Contractor chu an chah bawk a ni.
General Nursing and Midwifery (GNM) School Serchhip Building hi Ministry of Health & Family Welfare, Govt. of India hnuaia Centrally Sponsored Scheme of Upgradation/Strengthening of Nursing Services (Establishment of New Nursing Schools ANM/GNM) atanga kum 2010-2011 a sum hmuh Rs. 675,75,000/- hmanga sak a ni a, Administrative cum Teaching Building leh Hostel Building sak niin April 1, 2013-ah sak tan a ni a, January 3, 2018 khan sak zawh ni mah se luah lo a hun rei tak a awm tawh avangin tunah hian a Building hi a chhe nasa leh tawh hle a, a Building dinhmun a hmunah enin sak a nih anga hman tangkai a nih theihna tura mamawh hrang hrangte an enfiah a. Tunah hian Health & Family Welfare Department chuan estimate siama hma la mekin hemi atana tul leh pawimawh hrang hrangte pawh an sawiho nghal bawk a. Helai hmunah hian kumtin Nurse zir tur mi 20 zel lain zirlai 60 awm theihna tura ruahman a ni.
Nimin a heng hmun an tlawhna ah hian MSPMC atangin Secretary Er. Lalthanzuala Ralte bakah Member Prof. Chawngsailova leh David Lalthawmmawia leh Vanchhungi, Task Force te an tel a. Health Department atangin Lalchhanhimi, Joint Director (Nursing) leh F. Laltlangmawii, Asst. Director (Nursing) tel an tel bawk a. Serchhip-a Health Department atangin Sr. Chief Medical Officer Dr. LP. Malsawma, District Medical Superintendent Dr. ZD. Lalmuanawma leh an thawhpuite bakah heng hna thawh awmna Village Council aiawhte an tel bawk a ni.