Serchhip District Jail-ah TB natna chungchang zirtir

Ni 100 chhunga TB do beihpui thlakna, '100 Days TB Campaign' kalpui mekah nimin khan Serchhip District Jail-ah TB natna chungchang inhrilhfiahna leh TB vei dapchhuah beihpui thlak a ni.
Serchhip District Jail-ah he hun hman hi Ser-chhip TB Centre-a Public-Private Mix (PPM) Lalawmpuia Sailo chuan kaihruaiin Senior Treatment Supervisor (STA) Sailoliana Sailo chuan TB chungchang a zirtir a, mihring za zela 40 te hi TB natna kai sa anga ngaih kan nih thu leh kan taksa a a lo dolettu a chak loh chuan he natna hi a lo langchhuak ta thin tih sawiin, khawvel pumah kum 2030-ah TB hi umbo tum a nih laiin India sawrkar chuan kum 2025-ah umbo tuma tan a lak mek thu a sawi a. He hmalakna bawhzuina atan hian nikum December 7 atang khan ni 100 chhung awh tur TB natna dona hun hi Serchhip bakah Aizawl, Champhai leh Mamit District-ah te kalpui a nih thu a sawi a. Hemi atan hian kawng hrang hranga hmalak mek a nih thu a sawi a ni.

He hunah hian TB natna chungchanga zawhna leh chhanna hun hman niin TB chu invenna tur damdawi hmuhchhuah a la nih loh thu leh kan taksa enkawl thata tihchak a pawimawh thu te, he natna lanchhuah dan hriata chumi anga inring-hlel te chuan mahni dinhmun hrefiah tura in test vat thin a pawimawh thu te tarlan a ni bawk.

Nimin-a he hun hman ah hian Serchhip District Jail-a awm mi 87 te chu enfiah niin heng zinga mipa 15 te chu an dinhmun enfiah zui turin Sample lak sak an ni bawk a, Serchhip District TB Centre atangin thawktute an kal a ni.

Serchhip District Jail-ah hian tun dinhmun ah tang mi 83 an awm mek a, an zinga mi 79 te chu mipa niin hmeichhia 4 an awm mek bawk a, heng tang zinga mi 45 te hi an thubuai ngaihtuah lai niin mipa 42 leh hmeichhia pakhat an ni a. Jail a awm mek mi 38 te chu an thubuai ngaihtuah tawh leh thianloh chang te an ni a, an zinga pakhat hi hrehawm taka tang tura chungthu rel sak a ni.