Serchhip-ah kangmei ven hapta hawnna neih a ni

Kumin-a kangmei venna hapta, Fire Prevention Week chu Mizoram hmundang te rualin Serchhip District-ah pawh nimin khan District Bawrhsap Paul L. Khuma chuan a hawng.

Kangmei Venna Hapta hawnna hun New Serchhip YMA Hall-a neih ah hian Serchhip District Fire Prevention Committee Chairman leh Bawrhsap Paul L. Khuma chuan kangmei chhuak avanga har-satna lo thleng tawh thin te a thlen tawh lohna tur leh kan fimkhur loh avanga chhiatna rapthlak thleng thei laka kan him theih nan sawrkar hotuten kangmei ven hapta - Fire Prevention Week hi kumtin Awareness Campaign neihna hun atan an buatsaih thin thu a sawi a. Khuarel chhiatna avangin kangmei chhuak ve bawk thin mah se In kang leh ram kang za zela 99% chu a neitute, ram kal te, huan leh lo neitute kan fimkhur tawk loh vang a ni tih a sawi a. “Kangmei a chhuah loh nan mitin in mawh kan phur a; kan hriatna leh thiamna, kan tha seng ila, kan mawhphurhna i hlen theuh ang u,” tiin mipuite a sawm a ni.

Serchhip District-a Fire Prevention Week hawnna hun hi Serchhip District Fire Prevention Committee-a Member Secretary leh DFO Then-zawl Dr. R. Lalnunrenga chuan kaihruaiin report a pe a, Sawrkarin kumin a Lo hal hun bi a tuk - March 15 hmaa lo hal vek tur te, uluk taka mei kawng sial tur te, ram kal te pawhin mei an chhem a nih chuan timit loa kalsan lo turin a chah a ni.

He huna kalkhawm te hian kangmei veng tura thutiam, Pledge on Fire Prevention Week, 2025 chu Serchhip Sub-Headquarters YMA President Kawlthuama kaihhruaia sawirualin thu a sawi nghal a, North Vanlaiphai DFO C. Lalkhawthanga chuan lawmthu sawiin hun a khar a ni.

Kangmei venna Hapta hi tun thla ni 15 thleng hman a ni dawn a, hemi hun chhung hian kangmei ven pawimawh zia inzirtirna kawng hrang hranga neiin kangmei venna kawnga hma la tha khua te pawh thlanchhuah leh tur an ni ang.