Serchhip District-ah VC Inthlanpui tluang taka neiin Rorellai ZPM Party in Seat an la tam ber
Nimin-a Village Council Inthlanna neih hi Serchhip District chhunga VC hrang hrangah pawh boruak muanawm tak hnuaiah neih a ni a, ruahman lawk angin Vote thlakna tur VC Area hrang hrangah zing dar 7:00 atanga Vote hi thlakin khawi hmun atang mahin thil duhawm loh a thlen hriat a ni lo a, Serchhip District Election Officer leh Bawrhsap Paul L. Khuma leh SP MS. Dawngkima te chuan chawhma lamah Serchhip Town chhunga Polling Station hrang hrangte tlawhin Vote thlak kawnga harsatna awm te an enpui a, Polling Station thenkhat ah chuan mipuite tana Vote thlakna tur hmun belh a ni bawk a. Serchhip District-ah hian Village Council 56 awmin voter 50,594 a awm a, mipa 18,386 leh hmeichhia 18,801 ten Vote hi thlakin Vote thlaktu hi an vaiin mi 37,187 an ni a, Vote za zela 75.87 a tla nia chhinchhiah a ni.
Nizan khan Vote tla te hi chhiar nghal niin ZPM Party chu Party mal-a Seat la hnem ber an ni a, ZPM hian Baktawng, Bawktlang, Buangpui, Bungtlang, Chhiahtlang North, Chhunthar Tlangnuam, Darnam, East Lungdar, Hmawngkawn, Hmuntha, Hmunzawl. Hualtu, Kanghmun South, Khumtung, Leng, Lungkawlh, Lungpho, North Mualcheng, North Vanlaiphai-II, Neihloh, New Serchhip North, Piler, Rullam, Serchhip Vengchung, Serchhip Dinthar, Serchhip Field Veng, Serchhip Kawnpui North, P&E Veng, Thentlang, Thenzawl East, Thenzawl South, Thenzawl South, Thenzawl West, Thinglian, Zote South, Chhiahtlang South leh Vanchengte ah te sawrkar an siam thei dawn niin a lang a, MNF in Chekawn, Hriangtlang, Khawbel, Ngentiang, Sailulak,Sialsir leh Thenzawl Vengthar-ah te sawrkar an siam thei dawn niin a lang a. Congress Party in Khawlailung, Lungchhuan, Serchhip Hmar Veng leh Thenzawl Kanan-ah sawrkar an siam thei dawn niin a lang a, chak bik awmlohna VC 7 a awm bawk a ni. Serchhip District-a VC Seat 254 awmah ZPM hian Seat 155 lain MNF in Seat 57 leh INC in seat 36 an la a, Independent in Seat 6 an la bawk a ni.