Mizoram-a VC/LC inthlan neih zawh takah Vote tla a tha lutuk lo niin a lang

Mizoram District 9-a Village Council leh Local Council Inthlanna neih zawh takah Mamit District chu Vote tlak thatna ber District niin Aizawl District-ah chuan Local Council Inthlanna ah Vote za zela 63.87 a tlak laiin Village Council Inthlanna ah za zela 50.83 chauh a tla phak a ni.

Mizoram District pakua-a Village Council leh Local Council inthlanna February 12, 2025-a neih a Vote tlak thatna ber District, Mamit District chhungah hian Village Council 92-a awm a, Voters 63613 awmah mipa Voters 24679 leh hmeichhia 24293, a vaiin Vote 49158 tla-in hei hi 77.1% a ni a. Mamit District-ah hian Village Council Seats General-ah 310 leh Reserved-ah 98, a vaiin Seats 408 a awm a ni. Aizawl District-a Local Council inthlanna neih ah Vote za zela 63.87 tlain Village Council inthlanna ah Vote za zela 50.83 a tla thung a, Aizawl District-ah hian Village Council 70 awmin Voter 65,076 atangin vote tla zawng zawng chu Election duty te nen 33,708 a ni a, hei hi za zela 50.83 a ni. Aizawl Municipal Council huamchhungah Local Council 87 zinga 86-ah niminpiah khan inthlanna neih niin voter 2,41,076 awmin Election duty avanga vote lo thlak hmasak tawh nen belhkhawmin a vaiin Local Council 86-ah hian vote 1,53,986 a tla a, hei hi za zela 63.87 a tling thung a ni.

Lunglei District chhunga Village Council 85 leh Lunglei Municipal Council (LMC) huamchhunga Local Council (LC) 24-ah vote awm zawng zawng 92,669 atangin vote 70,513 (76.09%) a tla a. Lunglei District-a VC 88 leh LC 24 awmah VC pahnih Sailen leh Sumasumi-ah te chuan vote thlak ngai lovin inthlan chuhtute tling-ah puan an ni a, Lalnutui-ah Candidate thi a awm avangin nimin khan Vote thlak that a ni.

Champhai District chhunga Village Council 61-a inthlanna neih ah vote za zela 71.73 a tla thung a, Champhai District-ah hian Village Council 62 awmin Vangchhia-ah Vote thlak ngai lovin chuhtu awm lovin Candidate 5 te tling ah puan an ni a, Hei bakah hian Buang-ah Reserved Seat-ah MNF Candidate chu tling a puan a ni a, Melbuk-ah Reserved Seat-ah chuhtu awm lovin ZPM Candidate chu tling a puan a ni bawk.

Kolasib District chhunga Village Council 60-ah te pawh inthlan buatsaih a ni a. Inthlan hi boruak muanawm tak hnuaiah neih zawh niin Ballot a vote tla zawng zawng hi za zela 72.27 a ni a, PED vote chhiar telin za zela 72.66 a tla a thung a ni. Kolasib District-ah hian Village Council 60 a awm a, Kawnpui IV VC-ah Vote thlak ngai lovin chuhtum awm lovin hming pelut te tling ah puan an ni a, Kolasib District VC 60 ah te hian voter 63350 an awm a ni.

Serchhip District khaw hrang hrangah khaikhawmin vote 75.87% a tla a. Serchhip District-ah hian Village Council 56 awmin VC pakhat-ah chuan Vote thlak ngai lovin Candidate 5 te tling-ah puan an ni a, a vaiin chuhtu awm lova tling a puan mi 7 an awm a, voter 50,594 an awm a, heng zinga mi 37,187 ten vote an thlak a ni.

Saitual District-ah mi 28,645 in vote thlakin zela 72.03 a tla a, VC Inthlanpui 2025-ah hian Saitual District chhungah Candidate 513 awmin Hrianghmun Village Council-ah member pathum te chu chuhtu awm lova tling-ah puan an ni.

Hnahthial District-ah chuhtu awm lova tling-a puanna tel lovin vote nei 22,936 awmin Village Council zawng zawngah vote 16,904 a tla a. Vote tla hi za zela 73.7 a ni. ZPM chiah dinna Lungpuitlang leh New Kawnpui awmin heng VC-ah hian ZPM Candidates te chu tlinga puan an ni.

Khawzawl District-a vote tla zat chu 73.93% a a ni a, Khawzawl District-ah hian Village Council 38 a awm a, Polling Station 63 awmin voter 27,726 a awm a, Tualpui VC-ah ZPM Candidate pathum te chu chuhtu awm lovin tling-ah puan an ni.