SBI in Mizoram tan hlan

State Bank of India (SBI) Mumbai Managing Director, Vinay M Tonse chuan Mizoram infiammite hman tur infiamna bungrua chi hrang hrang leh Mizoram Youth Commission (MYC) tan Bus pakhat a hlan.

Inrinni-a thlipek hlanna hunah Vinay M Tonse, Managing Director, SBI chuan Infiamna bungrua te chu Corporate Social Responsibility (CSR) hnuaia pek a nih thu sawiin, a vai hian cheng nuai 25 hu a ni tih a sawi a, tangkai taka Mizo thalaite'n an hman a duh thu sawiin, Infiamna bungruate hi Sports Minister Lalhnghinglova Hmar hnenah a hlan a ni. Hei bakah hian Mizo-ram Youth Commission Chairman Malsawmzuala hnenah Seat 20 awm Bus, cheng nuai 25 hu chu a hlan bawk.

Sports Minister Lalnghinglova Hmar chuan Olympic 2036 hmachhawp an neih mek laia hetianga infiamna bungrua SBI in an pek avang hian lawmthu a sawi a. Mizo thalai te tana din, Mizoram Youth Commission-te'n Bus an dawn thu ah lawmthu a sawi bawk.

Hemi hma Zirtawpni kalta tlai khan SBI Managing Director Vinay M. Tonse hian Chief Minister Lalduhoma chu a Pisa-ah hmuin Chief Minister hian Mizoram-ah SBI in hna tha taka an thawh thin avangin lawmthu a lo hrilh a. Mizoram in a mamawh avanga LP. Lalchangkima, DGM, SBI chu deputation tura an dilna an tihhlawhtlin sak avangin lawmthu a lo sawi bawk.

He hunah hian SBI Clerical Cadre a Mizo thalai tam zawk an luh theih nana Special Recruitment neih theih dan tur te, Mizoram sawrkarin infiammite tana Empowering Mizoram Sports a kalpui meka SBI Foundation nena thawhho dan tur te, Bank ten Income Tax Returns Certificate an lo phut thin avanga Income Tax pe ve lo Mizo mipuiten harsatna an tawh thin chinfel dan tur te an sawidun a. SBI leh Bank thenkhat ten CD ratio tha taka an kalpui laia Bank thenkhat ten an tih that tawk loh thute pawh an sawi a ni.