Mizo mipui ten MZU an ngaihven a pawimawh ti

Mizoram University Alumni Association (MIZUAA) President Dr Henry Zodinliana Pachuau chuan Mizoram University chu Mizoram a zirna In lian ber leh rampum huapa tha ber pawl a nih avangin Mizo mipuiten a chungchang ngaihven tam a pawimawh tih a sawi.

Mizoram University-a zirlai hlui intelkhawm MIZUAA te hian Inrinni khan Aizawl Press Club-ah thuthar thehdarhtute kawmin MIZUAA President chuan University that zawng endikna, NAAC Peer Visit chu thla thar March ni 4 atanga ni 6-ah MZU in a hmachhawn leh dawn tih a sawi a. Hetah hian MZU laka mipuiten ngaihdan tha an neih a pawimawh thu a sawi a. NAAC Accredition chu kum 5 dana neih thin a nih thu leh India rama zirna In sang tehnaah chuan a pawimawh ber a nih avangin kawng hrang hrangah that a ngai tih a sawi a. Tunah hian kum 2014-2018 chhungin ‘A’ Grade a nih mek thu leh ‘A’ Grade emaw, a chunglam ni turin an inbuatsaih chhoh mek thu a sawi a. Kumin atangin MZU-a lut tur ten CUET an hmachhawn zel a ngaih tawh dawn thu a sawi bawk.

MIZUAA President chuan an pawl din tirh atangin hmalakna neuh neuh a awm chho zel tih a sawi a. Programme hrang hrang huaihawt thin a nih thu leh nikum atang khan member te kohkhawm hna an thawh chhoh thu a sawi a. He hun hi an pawl-a in register lo sing tel la awm te an kohkhawmna a nih thu a sawi bawk.