Sawhthing lei turin Serchhip District-a inpeih thawkhat

Mizoram sawrkar in ruahmanna a siam anga tun thla ni 20 atanga Sawhthing lei turin Serchhip District-ah inbuatsaihna peihfel thawkhat a ni tawh.

Mizoram sawrkar in tun thla ni 20 atanga hmun hrang hranga Sawhthing lei a tum chung-chang ah LENKAWL zawhna chhangin District Agriculture Marketing Committee-a Member Secretary leh Serchhip DAO Lalchharliana chuan Sawhthing leina tur hi hmun 7 ruahman a nih thu a sawi a. A tirah Sawhthing leina tur, Secondary Collection Centre chu pali ruahman ni mah se kuthnathawktute tana awlsam zawkna tur ngaihtuahin pathum siam belh leh a nih thu a sawi a, heng hmun 7-ah te hian tun thla ni 20 atang hian Sawhthing hi lei tum a nih thu leh tunah hian Sawhthing dahna tur Buara te pawh rawn thleng tawhin semdarh mek a nih thu a sawi a ni.

Serchhip DAO sawi danin Chhingchhip-a Secondary Collection Centre-ah khaw 11- Chhingchhip, Khumtung, Baktawng, Phul-mawi, Hmawngkawn, Chhuanthar Tlangnuam, Sialhau, Vanchengte, Thentlang, Hmuntha leh Khawbel ten Sawhthing hi hralhin Serchhip Secondary Collection Centre, Chhiahtlang dai-a Supply Kudam hmun-ah Serchhip bakah Chhiah-tlang, Keitum, Bungtlang leh Chhiahtlang ten an hralh thei dawn a. Thenzawl SCC-ah Thenzawl, Kanghmun South, Zote South, Buangpui leh Neihloh ten hralhin Khawlailung SCC-ah Khawlailung, Piler, Chekawn, Sialsir leh Lungkawlh ten an hralh ang.

North Vanlaiphai SCC-ah North Mual-cheng, Bawktlang, Lungkawlh leh North Vanlaiphai ten Sawhthing hi hralhin, East Lung-dar SCC-ah East Lungdar bakah Leng leh Sai-lulak in an hralh anga, Lungpho SCC-ah Lungpho bakah Ngentiang, Hmunzawl, Thinglian leh Rullam ten an hralh bawk anga. Sawhthing lei tur zat hi tihchian a nih loh thu leh SCC tinah hian Coordinator awmin an buaipui dawn thu a sawi a ni.