CM in Serchhip damdawi In sak mek a hmunah a tlawh

Serchhip Bialtu MLA leh Chief Minister Lalduhoma chuan nimin khan Serchhip rawn tlawhin Serchhip District Hospital sak mek chu a hmunah a tlawh.

Serchhip District Hospital sakna tur sum hi Power Grid Corporation of India Limited (PGCIL) CSR atangin cheng vbc. 21 hmuh a ni a. Amah-erawh chu engemaw harsatna avangin a sak hna hi tan nghal mai a ni lova. Sawrkarin nikum khan NESIDS atangin cheng vbc. 50 dah belhin hna pawh tan nghal a ni ta a. CSR Fund atanga hmuh cheng vbc. 21 senna tur chin hi Block A tia vuahin tunah hian Contractor in a thawk mek a, an hnathawh chin te hi Chief Minister chuan a hmunah enin a thawktu ten an hmalakna te an hrilhfiah bawk a ni.

He Damdawi In Building sa meka harsatna an tawh hrang hrang te pawh Chief Minister chuan a hmuna an en laiin a kaihhnawih official pawimawh te phone-a be nghal zelin, hna a kal chak theih nana tihtur awm ang angte chu rang taka bawhzui zel anih tur thu a sawi a. District Hospital ram kaltlang lova kawngpui siamna tur sum pawh ruahman thuai a nih theihna turin hma a la nghal bawk a ni.