RDC 2025-a tel NCC te lawmna Larsap in buatsaih

Republic Day Camp (RDC) 2025-a tel Mizo NCC Cadet 58 te hmuahna leh lawmpuina hun chu nimin khan Governor Gen (Dr) Vijay Kumar Singh chuan Raj Bhavan Circular Lawn-ah buatsaihin Chief Minister Lalduhoma leh Sports & Youth Services Minister Lalnghinglova Hmar te pawhin an telpui a ni.

Kumin Republic Day Camp (RDC)-ah hian Mizoram atangin NCC Cadet 58- 20 Mizo Bn. NCC Pipe Band Cadet 45; 1 Mizo Bn. NCC Cadet 2; 2 Mizo Bn. NCC Cadet 1; 1 Mizo Air (Flying) Squadron NCC Cadet 3; Thal Sainik Camp-a tel 20 Mizo Bn. NCC Cadet 1 leh All India Vayu Sainik Camp-a tel 1 bakah Mizo Air (Flying) Squadron NCC Cadet 6 te an tel a. Governor leh Chief Minister-te hian Republic Day Camp-a tel NCC Cadet-te hnenah chawimawina an hlan bakah an tawnhriat te zawtin an kawm bawk a ni.

Larsap Gen (Dr) Vijay Kumar Singh chuan India ram pum huap leh ngaihhlut hlawh tak Republic Day Camp (RDC) a Mizoram NCC Cadet-te an tel thei chu ropui a tih thu leh hemi tura Mizorama NCC Unit hrang hrangte thawh-rimna, inpekna leh rawngbawlnate chu chhuanawm a tih thu a sawi a, NCC chuan thalaite nunah in thununna, hruaitu zia leh ram hmangaihna a tuh a ni, a ti. NCC chu ram hruaitu chherchhuaktu pawimawh tak a lo nih tawh thin thu leh NCC ah chuan taksa leh sipai lam kaihhnawih intuaihriamna mai bakah kawng engkima hmasawnna ngaihpawimawh a ni a, training tha tak tak an neih thin avangin Armed Force-ah te pawh an tlin phah thin tih a sawi bawk.

Larsap chuan amah ngei pwh NCC-ah a lo tel tawh thu leh a ngaihhlut thu sawiin, Mizoram-ah thalai tam zawkten NCC an zawma hma an sawn pui ngei a beisei thu a sawi a. NCC Directorate NER te hlawhtlinna chu Cadet mai bakah nu leh pate tana chhuanawm tak a nih thu sawiin, an hmalakna thlawp zel a tul thu a sawi bawk.