IAF kut-a Lengpui Airport hlan chungchang NGOCC aiawh ten Chief Minister an sawipui
NGO Coordination Committee (NGOCC) Mizoram chuan nimin khan Chief Minister Lalduhoma chu hmuin Lengpui Airport chu Indian Air Force (IAF) kutah hlan mai lovin, kawng dang dap leh hram turin an ngen a, Chief Minister chuan sum mamawh an hmuh theih chuan enkawl an inhuam thu a lo hrilh thung a ni.
NGOCC Mizoram hian Chief Minister Lalduhoma hi hmuin a Office Cabinet Room-ah an inkawm a, NGOCC aiawhte chuan Mizoram in Airport a neih chhun tunhnaia Indian Air Force (IAF) kuta Mizoram sawrkar-in hlan a tum chu ngaihtuah nawn turin Chief Minister a ngen a. “Airport enkawl a hautak avang leh sum lama harsatna sutkianna tura sawrkar hmalaknaah hian Indian Air Force (IAF) kutah hlan mai lovin, kawng dang dap leh hram turin kan ngen che u a ni,” an ti. NGOCC hian August 9, 2024 khan IAF kut-a Lengpui Airport hlan an rem tih loh thu thuchhuah siama an lo tarlan tawh thu pawh sawiin, tun tumah hian IAF kut-a Lengpui Airport hlan lo tura ngenna lehkha an thehlut leh a ni.
Chief Minister Lalduhoma chuan Airport hi enkawl a hautak em em tih NGOCC aiawhte hi lo hrilhin, “Ram dang anga Airport changtlung leh tha kan duh a nih chuan midang enkawl duh kan zawn a ngai a. Keini chauh hi midang kuta hlan tum kan ni lo. Sawrkar kal tawh zawng zawngte pawhin Airport enkawl hautak zia an hria a. AAI leh IAF kuta hlan tumin an lo dawr tawh a ni,” a ti a. 16th Finance Commission-ah Airport tih changtlunna tur leh runway thar siamna tur an dil dawn tih sawiin, “Min phal saka, kan sum mamawh min pe thei a nih chuan Mizoram sawrkar in enkawl zui hi kan inhuam reng a ni,” a ti a, NGO hrang hrangte pawh 16th Finance Commission-ah a theih ang angin Mizoram sawrkar hmalak tum dan hi lo dawra lo sawipui turin a ngen bawk.
Chief Minister chuan, Lengpui Airport hi India ramah State-in a enkawl awmchhun a ni tih pawh sawiin, “Khawi State mahin Airport an enkawl zo lo, Airport Authority of India (AAI) meuh pawhin an Airport enkawl hi Private Company-te hnenah an hlan mek zel a. Keini ang State rethei-in Airport zo leh zo loa kan enkawl hi a hautak hle a, Airport changtlung tak Mizoram-in kan neih hi Sawrkar in kan duh ber a ni a ti bawk.