Nunphung Hrisel inzirtirna leh inbuatsaih dan zirho a ni

Health & Family Welfare Department chuan nimin khan Nunphung Hrisel inzirtirna leh chumi atana inbuatsaihdan tur 'Special Workshop on Promoting Healthy Lifestyle: A journey towards Well-being' chu Aizawl-a Assembly Annexe Conference Hall-ah an hmang.

He Workshop-ah hian Health & Family Welfare Department-a Principal Director Dr. Vanlalsawma chuan tunlai a Mizoram-a thihna leh natna, Thisensang, Zunhlum, Cancer, Stroke leh Lungphuchawl in Zofate min run nasat thu sawiin, Social Media chak tawh zia leh influencer-te pawimawhna te a tarlang a. Department in program hrang hranga hna a thawhnaah te pawh milarte nen a thawhho thiam a tul tawh zia tarlangin, milarte pawhin anmahni theihna zawn theuhah Department-te chu thawhhopui thin turin a sawm nghal a ni.

He hunah hian National Health Mission a Mission Director leh MHSSP Project Director Dr. Eric Zomawia chuan nunphung hrisel ngaih-pawimawh tawk loh avanga natna leh a hunloa thihna awmchhan te a sawifiah a. Mimal tin ten mahni kan inven theih dan kawngte a sawi nghal bawk a. Ruth Lalawmpuii, Consultant, MHSSP pawhin Community Intervention – Damna Kawl Eng hnathawh dan sawiin, chumi kaltlanga District paruk (6)-a khaw 510-ah hmalakna kalpui mek a nihdan report-te a pe a. Walkathon– 2025 buatsaih thuai a nih tur thu leh a kalphung turte a tarlang nghal bawk.

He hunah hian Mizorama milar leh entawn-tlak thlan bik, thiamna hrang hrang neite telin anni hi nunphung hrisel neih kawnga entawn tur (Healthy Lifestyle Ambassador) atana ruat nghal an ni a. Dr. Zorinsangi, Asst Director (Procurement) chuan Healthy Ambassador-te thutiam lakpuina hun a hmang a, Free Health Screening neih zui nghal a ni bawk.