Political party ten VC leh LC Inthlan-a thlantlin te an lawmpui thu an sawi

Mizoram-a Village Council leh Local Council inthlanna neih zawh takah Political party hrang hrangte chuan thlantlin te an lawmpui thu thuchhuah siamin an tarlang.

ZPM Party chuan nimin khan thuchhuah siamin Local Council leh Village Council General Election neih zawh taka Veng leh khaw hrang hranga LC/VC member thlantlin te chu ZPM General Headquarters chuan a lawmpui takzet tih an sawi a, Ram, Veng leh khawtlang tan thahnemngai taka thawk turin duhsakna an hlan thu an sawi a. Hmun hrang hranga LC/VC member tharte chu khawtlâng rawngbawlna hna thawk tura an rintawk thu sawiin, mipui tana sawrkâr hmalâkna-ah tha taka thlawp a thawhpui turin an ngen bawk a. ZPM thuchhuah chuan tun VC/LC General Election-a hnehna chang rih lo, mi tha tak tak leh Veng leh khawtlang tana hmathlir nei tha tak takte pawh an tha leh zung, ngaihtuahna te ram leh khawtlâng rawngbawlna atâna sênga huaisen taka hma lam pan zêl turin duhsakna an hlan thu an sawi bawk a ni.

MNF Party pawhin nimin khan thuchhuah siamin ZPM sawrkarna hnuaia hnawhsarum zeta Village Council leh Local Council inthlanpui buatsaih chu a lo zo ta tih tarlangin, “Thlantlin ni ta zawng zawngte MNF chuan a lawmpui takzet a, tling zo ta lo te chu a tawrhpui takzet a ni,” an ti a, “Sawrkar thar phur vanglai leh an kalthui hmaa inthlan hmachhawn kan ni a, tum dang LC/VC inthlan neih tawha Ruling Party ten chakna an chan thin dan nena khaikhinin tun dinhmuna MNF-in chakna kan chan dan thlirin a lawmawm kan ti a. He inthlan result hian ZPM Party chu mipuite rilruah tlakhniam lam nasa takin an pan zel tih a tarlang chiang hle,” an ti a. VC/LC thlan thar zawng zawngte chu kalphung thar mipui sawrkar an zawrh ang ngeiin, mipui tan thleibik awm lova hnathawk thei turin thuam chak se, thuneihna semzai kawnga mipui sawrkar din an tum chu thlan tharte hmang hian a takin hmang nghal tawh se an duh takzet tih an sawi bawk.

PC Party pawhin Village Council leh Local Council inthlana tling zawng zawng te an lawmpui thu nimin khan thuchhuah siamin an tarlang a, “Harsatna lian tham awm lova Village Council leh Local Council inthlan tluang taka kan nei thei hi PC Party chuan a lawmawm kan ti a. He inthlana tling zawng zawng te kan lawmpui a, mahni khawtlang leh ram leh hnam tana tangkai taka hna thawk thei turin duhsakna kan hlan hlawm a. Inthlan buaipuitu zawng zawng te pawh tlin taka an hna an thawh avangin kan chhuangin kan lawmpui hle a ni,” tiin VC leh LC te chu khawtlang tan mai ni lovin ram leh hnam tan an pawimawh thu an sawi bawk.