HIV+ hmuhchhuah zingah Sex atanga kai tam

Mizoram State AIDS Control Society (MSACS) chhinchhiah danin kum 2024 April thla atanga nimin thleng khan Mizoram-ah HIV Positive hmuhchhuah thar 1669 an awm, heng zinga 1015 hi hmeichhiat mipat hmanna avanga kai a ni.

MSACS, AIDS Healthcare Foundation India Cares leh Samaritan Society of Mizoram-te hmalaknain nimin khan ‘International Condom Day’ chu Aizawl-a Millennium Centre Roof Top-ah hman a ni a, he hunah hian Mizoram State AIDS Control Society Project Director Dr. Jane R. Ralte chuan Generation C Campaign leh Love Brigade 2.0" Campaign a hawng nghal bawk a. He hun hmanah hian Mizorama HIV kai hmuhchhuah tawh zinga zaa 60 aia tam chu mipat hmeichhiatna atanga kaite an ni tih tarlangin, HIV kai hmuh-chhuah tawhte hian HIV inkaichhawn dan an sawi thei deuh vek tih leh ngaihzawng kawppui nghet leh an mi hriatchiante mipat hmeichhiatna an hmanpuinaah condom an hman loh avanga HIV kai an ni deuh vek tih tarlan a ni bawk.

Generation C Campaign-ah hian thalaite hnenah Condom hman tangkaina leh a pawi-mawhna zirtirna ngawr ngawr ni lovin, nupui/pasal neih hma chu mipat hmeichhiatna hman loh a him ber thu zirtirna uar taka kalpui a ni dawn a ni.

Hemi kawng beihpui thlakna Love Brigade Campaign hi kum 2020 atanga kalpui tawh niin, tun tum a thawhhnihna ah hian Two Wheelers Taxi Association te nen tangkawpin Two Wheelers Taxi Driver engemawzat hnenah Condom jacket sem a ni a. Heng bakah hian Love Brigade Campaign thawh hnihna ah hian Aizawl a Auto Drivers Association te hnenah HIV chung-chang zirtirna hmanruaw dahna tur seat cover sem a ni dawn bawk a ni.

International Condom Day hi kum 2009 atang khan February ni 13-ah hman thin a ni a, HIV darh zel tur venna atana Condom hman a pawimaw zia inzirtirna atan te hman a ni.