Police Station biakpawh mumal theih loh niin sawi
Centre for Environment and Social Justice chuan Dan leh thupek kengkawhtute inthlahdah thin chu pawi an tih thu sawiin, Mizoram-a Police Station biakpawh theih mumal a awmlo tih an sawi.
Nimin-a Aizawl Press Club-a thuthar thehdarhtute an kawmna ah CESJ General Secretary VL. Thlamuanpuia chuan Mizoram puma Police Station 54 awm te chu biakpawh tumin ni engemaw zah chhung hma an lak thu an sawi a, heng zingah hian Police Station pahnih (2) chiah an biakpawh theih tih a sawi a, Police Station biakpawh theihna atan hian Station Officer Incharge (OC) te Personal Phone number hman a nih thin thu leh OC te transfer an nih hian Station biakpawh theihna number tarlan thin chu update a nih ngai loh thu leh hetianga mimal Cell Phone/Personal Contact No, Police Station biakpawhna tura hman hi thil diklo a nih loh thu an sawi a ni.VL. Thlamuanpuia chuan tunhnaiah khawtlang leh Veng Duty ten misual nia an ngaih leh rinhleh an man thinte chunga an chet dan avangin Mizoram mipui thinurna cho chhuak tualthihna a thlen thin thu leh hetiang thil hi tunhma pawha a thlen fo thin thu an sawi a, Heng thil thleng hian Mizoram hi 'Lawless Society' an nihzia a tihlan chian bakah sawrkar chu dan kenkawh kawngah a hlawhchham hle niin a sawi a. The Mizoram Police Act, 2011 hnuaia ‘Chapter-VI Policing in Rural Areas and Village Police System’ in inkaihhruaina dan a siam leh kalpui dan tur a duana dan awmsa pakhat mah zawm a hlawh lo chu pawi an tih thu a sawi bawk.
Comments
Post a Comment