MCC a kalh loh thu sawi

Aizawl West-II Bialtu MLA Lalnghinglova Hmar chuan tunhnaia a thusawi chuan Model Code of Conduct a khalh loh thu a sawi.

Nimin a ZPM party Chhung Inkhawm Aizawl-a neih ah Aizawl West-II Bialtu MLA Lalnghinglova Hmar chuan January 27, 2025-a Vaivakawn YMA Conference Centre-a Local Council inthlan lo awm tur atana ZPM Party candidate te inhmuh-khawmna ah Party mi a nih angin sawm a nih thu leh thu pawh a sawi thu a sawi a. “Mizoram Sawrkar in Aizawl West-II bial tana a hmalak tawhna te sawiin, SASCI Part-III hnuaia Aizawl West Outlet Project, Motor kawng siamna tur Mizoram Sawrkarin a ruahman fel tawh thu leh hemi atana sum pawh min pek tawh thu ka sawi a, Administrative Approval pawh hmuh vek tawh a ni. Vaivakawn Market sak thatna tur Mizoram Sawrkarin a ruahman fel vek tawh January ni 7 a State Level Committe on SASCI in Local Council inthlan a puan hmaa a pawm fel vek tawh a ni a, vantlang hmuh theih turin I&PR Website ah hemi ni vek tlai dar 5:00-ah dah chhuah vek a ni tawh bawk. Heng thilte hi Porject thar a ni lo a, Sawrkar hmalak tawhna a lawmawm kan tih em vanga I&PR te pawhina an tarchhuah tawh kan han sawi nawn ve leh mai a ni a. A lawmawm tehlul nen mi thenkhat chuan SEC-ah MCC bawhchhia tiin min hek ta a ni,” a ti.

Aizawl West-II Bialtu MLA chuan, “Model Code of Conduct chuan, inthlan atana Vote duh vanga hmalakna thar puan a remti lo a, hemi hi hre reng chungin ka thusawina ah pawh Sawrkar hmalakna thar tur sawi chakawm tak takte pawh kan insum zawk a ni. Heng ka thusawite erawh hi chu Sawrkar hmalak tawhna a ni,” tiin “Mizoram tan pawha Sawrkar hmalak tawhna thu lawmawm vantlang hriata tarlan tawh kan han sawi chhuah ve leh te pawh inhek nan min hmang duh ta mai hi mipuite lawmna ah hian Party thenkhat chu an lawm ve lo niin ka hria ni,” a ti bawk.

Comments