ASF vangin ni 41 zet Vawk thi leh suat awm lo

Kumin (2025) chhungin Vawk pul hri, African Swine Fever (ASF) vangin Mizoram-ah Vvawk thi leh suat a la awm lova, ni 41 chhung a zawnin he hri avanga Vawk thi leh suat a awm tawh lo a ni.

AH&Vety Department hotute’n an sawi danin kumin kum bul January ni 1 atanga nimin thleng khan Mizoram-ah ASF avanga vawk thi leh vawk damlo suat a la awm lo a. Nikum December ni 24 atang khan vawk thi leh suat a awm tawh loh avangin ni 41 chhung chu a zawnin vawk thi leh suat a awm tawh lo a ni. ASF hri hi a reh rih a ngaih a nih laiin tun thla emaw, March thla emaw a khua a lum chhoh leh a, ruahtui tlem a tlak chuan ASF lhri hi la puang leh thut thei a nih thu an sawi a. Kum 2021 kum bul lam atang khan he vawk pulhri hian Mizoram a chen chilh tawhah an ngai a ni.

Mizoram hi ASF hri hian kum 2021 bul lam atang khan a chen chilh tawh a, kumtin a puang ta ziah a. Kum 2021 March ni 21-a Lunglei District-a Lungsen khua a ASF vawk pulhri a leng tih hmuhchhuah a nih atanga nikum kum tawp lam thleng khan Mizoram-ah Vawk 1,11,434 thi leh suat a awm tawh a ni.