Mizoram-a a pathumna ni turin Plastic leh tawih thei lo bawlhhlawh sawngbawlna hmun, Plastic Waste Management Centre chu Serchhip-ah kalpui turin PHE Department leh Green Herd SP te tangkawp chuan an buaipui mek a, hemi atan a mamawh hrang hrangte pawh peihfel khat a ni tawh bawk. Thudawn danin Plastic sawngbawlna hmun hi Zalreng ram, New Serchhip-ah bun a ni a, Serchhip District-a thingtlang leh khawpui-a plastic bawlhhlawh te hi lakkhawm a ni dawn a, heng te hi a sawngbawlna tur hmunah hian phurhkhawm a ni dawn a, hemi atan hian mumal taka inremna siam a ni tawh a ni.
Serchhip-a Plastic Waste Management Centre-a thawktu tur lak hna pawh hi kalpui mek niin Manager pakhat bakah Collector 4, Segregator 3, Driver 4 leh Chowkidar leh Machine Operator pakhat ve ve lak an ni dawn a, he hmalakna hi thlawp a, kan bawlhhlawh te pawh mumal taka khawl khawm turin mipuite chu an sawm nghal bawk a ni.
