Indo-Bangladesh Joint Boundary Inspection Team kawm

India leh Bangladesh ramri chhinchhiahna phun tur leh ramri a hnathawh a hmuna enfiahtu India leh Bangladesh ai awhte telna, Indo-Bangladesh Joint Boundary Inspection Team (Indo-Bangla Delegate)-te chu niminpiah khan Lunglei Bawrhsap Navneet Mann-i chuan Lunglei Circuit House-ah chawchhun buatsaih sakin inkawmna an nei.

He Joint Boundary Inspection hi November ni 12 - 14, 2024-a Kolkata-a 45th Joint Boundary Conference thurel bawh zuina a ni a. Ramri-a hnathawh mek endikna hi kumtin kalpui tura ruahman a nih laiin, COVID-19 hri leng avangin kum 2019-2020 atang khan chhunzawm theih a ni ta lova. Tun tum hi Covid hnua Joint Inspection kalpui leh hmasak ber a ni.

Tun tuma Joint Inspection-ah hian February ni 4 - 7 chhungin India ramchhungah endikna kalpui niin, February ni 7 - 10 chhungin Bangladesh ram chhung lamah endikna hi kalpui chhunzawm a ni anga. Joint Inspection Team-ah hian India leh Mizoram aiawh mi paruk leh Bangladesh aiawh mi pasarih an tel a. India Team hi Survey of India hnuaia West Bengal & Sikkim Geo-spatial Directorate-a Director Uday Shanker Prasad chuan hovin, Bangladesh lam hi Surveyor General of Bangladesh Brig. General Nur-E-Alam Mohammad Jobayer Sarwar chuan a ho a ni.