Naupang kum 4 mi sawisatu a puh man a ni

Naupang kum 4 nasa taka sawisatu a puh chu Champhai Police ten manin thubuai siam sak a nih hnuah Lung In-ah dah a ni.

Champhai District Child Protection Officer sawi danin, niminpiah khan Lalrampari, Champhai Venglai nia insawi chuan a nau awm, mipa naupang kum 4 mi chu na taka a sawisak thu an dawng a, Child Welfare Committee-in Champhai Police Station-ah FIR thehlutin naupang na taka sawisatua puh hi Champhai Police te chuan manin thubuai siamsak a ni a, nimin khan Champhai District Court-ah hruai niin Lung In-ah dahluh a ni. Thudawn danin naupang nu hi inhlawha a chhuah thin avangin a unaupa nupui Lalrampari hnenah a fapa hi a dah thin a, Lalrampari’n Police-te hnena a sawi danin naupang nu hian a chhun thil eina tur a fapa hi a ken tir thin a, niminpiah khan pawisa a ken tir leh ken tir loh a zawt a, pawisa a ken tir loh thu naupang hian sawiin, a nu a umzui a, a rawn kir leh mai tak loh avangin a zawng zui a, a hmuh hnu hian kut a thlak ta niin a sawi.

Naupang hi nikhaw hre loa a awm avangin DM Hospital-ah a hruai a, a ban veilam ruh tliakin, a lu ruh a khik bakah a lu-ah thi a tling bawk niin damdawi In-a thawktute chuan an sawi a, District Child Protection Unit hrilhin Child Welfare Committee-in hma an la zui ta a ni. He naupang kum tlinglo thlalak dan lova Social Media-ah vawrh darhtu pawh chhui zui mek a ni bawk.