Naktuk zan atangin MKTP Inkhawmpui nei tan dawn

Baptist Church of Mizoram (BCM) hnuaia Thalai Kristian Pawl (TKP) Inkhawmpui lian, Mizoram Thalai Kristian Pawl (MTKP) in-khawmpui vawi 48-na chu naktuk zan atang khian Lunglei-a Lunglawn mual-ah neih a ni dawn a, naktuk-ah Palai tam ber te chuan Lunglei hi an pan ang.

Kumin-a MTKP inkhawmpui vawi 48-na ah hian Lunglei khaw pawn atanga riaklut tura in report 5634 awm tawhin heng bakah hian Khualtha Mizoram pawn atangin lokal tura in report 30 chuang an awm tawh a, heng bakah hian Mizoram chhunga Kohhran dang Presbyterian atangin Central KTP, Lairam Isua Krista Baptist Kohhran, Evangelical Church of Maraland, Bru Baptist thalai, Chakma Baptist leh IKK Thalai pawhin palai an tir dawn a, heng bakah hian Mission Field Zaipawl an tel dawn bawk a ni.

MTKP Inkhawmpui vawi 48-na ah hian ‘Pathian hnaih rawh u’ tih chu thupui atan thlan niin naktuk, February ni 13, 2025 (Ningani) zan atangin inkhawm a awm tan anga, a tuk Zirtawpni-ah Rorel inkhawm neih tur niin Inrinni leh Pathianni-ah inkhawm a awm anga, Inkhawmpui hi Pathianni zanah a tiak dawn a ni.

Tun tuma Inkhawmpui neihna tur atan hian Lunglei-a Lunglawn mual-ah pandal sak niin ‘Krista Pasalthate Rûn’ tia vuah a ni a, Pandal-ah hian mi 8000-9000 vel leng thei tura beisei niin pandal hi peihfel thawkhat a ni tawh bawk. Khawmpui dawngtu tur Lunglawn Pastor Bial hian Budget cheng nuai 70 dahin heng zinga nuai 42 chu MTKP in a tumpui a ni.

Mizoram Thalai Kristian Pawl (MTKP) ah hian tun dinhmunah member 50364 awmin hmeichia 19802 leh mipa 30562 an awm a, Unit 447 awmin Bial 92 an awm mek a ni.