Governor in Department pali hotute kawmin an hmalakna leh harsatna an tawh te a sawipui
Mizoram Governor Gen. (Dr) Vijay Kumar Singh chuan nimin khan Rural Development, Agriculture, Animal Husbandry & Veterinary leh Fisheries Department hotute chu Raj Bhavan-ah a hran theuha kawmin Sawrkar laipui Scheme pawimawh tak tak hnuaia an hmalaknate leh harsatna tawhte a sawipui.
Heng Department hrang hrang pali hotute a kawmna ah hian Governor chuan hmasawnna kawnga pawimawh tak, Sawrkar laipui Scheme hrang hrang hnuaia Mizorama hmalakna te hriatchian mai bakah harsatna tawhte Sawrkar laipuia bawhzui thuai a nih theih nana he inkawmna hi koh a nih thu a sawi a. Mipuite'n an tana ruahman hamthatna hrang hrangte an hriatchiana an chhawr tangkai theih nan Scheme chungchang a pawimawh hrilhhriat leh chhawmdawl kawnga theihtawp chhuah zel turin Department hotute a chah a ni.
Governor chuan Scheme tangkawp theite pawtkhawma hmasawnna ruhrel tha leh rotling siam ngaihpawimawh a tul thu pawh he hunah hian sawiin, Mizorama Self Help Group-te thil siamchhuah, sawngbawl dan leh zawrh tura chhawpchhuah a nih dan chu fakawm a tih thu a sawi a. Hmasawnna rahbi thar, loneitute tana tha zawk leh thlanawm tak ngaihtuah zel tura chahin, Organic thlai tharchhuah kawngah tan la turin a fuih a. Ran hriselna ngaihpawimawh a tul thu leh Sangha tharchhuah kawnga hmalak a tul thu a sawi a. Department hotute chu langtlang leh rintlak zawka hmalak a nih theih nan Digitization ngaipawimawh tel turin a chah bawk a ni.
Governor-in Department hrang hrangte a kawmna hunah hian Rural Development-a Commissioner & Secretary R. Zarzosanga; Fisheries Department-a Secretary H.M. Hualsangi; Agriculture Department-a Special Secretary Ramdinliani leh Lalnunhlua, Addl. Secretary, Rural Development; Dr. Andrew H. Vanlaldika, Addl. Secretary, AH& Vety leh bakah Secretariat leh Directorate-a hotute an tel a. Department-te hian PowerPoint Presentation kaltlangin an hmalaknate an sawifiah a. Sawrkar laipuia bawhzui ngai harsatna an tawhte an thlen nghal bawk a ni.