MTKP Inkhawmpui tiak ta

Zonuna Kawlni (LENKAWL) • February 17, 2025 • Comments • Mizoram

Mizoram Baptist Kohhran hnuaia thalaite intawhkhawmna lian ber, Mizoram Thalai Kristian Pawl (MTKP) Inkhawmpui vawi 48-na chu nimin Pathianni hmang khan Lunglei-a Lunglawn Mual ah neih a ni.

MTKP Inkhawmpui vawi 48-na hi Ningani zana tang khan neih niin ‘Pathian hnaih rawh u’ tih thu thupui atan hman a ni a, Zirtawpni khan Rorel Inkhawm neiin Unit aiawhin mi 367, Bial aiawhin mi 163 leh MTKP Executive 31 bakah sawmbik ten ro an rel a, Ram tana chawnghei tawngtai neih te, MTKP Youth Centre puala sum tuakna neih leh Rilru hrisel chungchang zirtirna neih te an thurel zingah a tel a ni.

Kumin-a MTKP Inkhawmpui-ah hian Mizoram hmun hrang hrang atangin riaklut palai 6000 chuang an awm a, heng bakah hian Mizo-ram pawn atanga Palai kal an awm bawk a ni. MTKP hnuaiah hian Bial TKP 92 leh Unit TKP 447 awmin, Member mipa 30,562 leh hmeichhia 19,802, an vaiin 50,364 an awm mek a, kum 2024 atanga member punna chu 1571 a ni.