Hmunphiah quintal 4000 chuang thawnchhuak tawh

Mizoram sawrkarin Hmunphiah lei tura a ruat Empanelled Buyer te'n Hmunphiah ro an lei tan mek a, State pawnah quintal 4000 chuang phurhchhuah tawh niin, Empanelled Buyer zingah February ni 18 thlenga Hmunphiah la lei lo te chu an inremna ennawn a ni dawn tih Mizoram Agriculture Marketing Board (MAMB) ten an sawi.

MAMB hotute chuan Hmunphiah ro lei tura Tender kaltlanga Empanelled Buyer 7 an thlante chu Hmunphiah an lei leh hralh dan uluk takin an vil zui reng dawn tih an sawi a, tunhnaiah Empanelled Buyer-te an kokhawm a, Hmunphiah an lei dan report-te ngaihthlak a ni a. Hmunphiah ro la lei lo Buyer pahnih an awm thu leh February ni 18 hma ngeia che tura an hriattir thu leh hemi hnuah pawh Hmunphiah a nla lei lo a nih chuan MoU an lo ziah tawh chu ennawn a ni dawn tih MAMB hotute chuan an sawi a ni.

MAMB-in an zirchiannaah chuan kuminah hian Mizoram-ah Hmunphiah quintal 99,545 vel tharchhuah beisei a ni a, Empanelled Buyers-te lei theih zat chi quintals 3190 a ni a, an lei zawh theih loh tur quintal 93,655-te chu lo neituten an hralh zawh ngei theih nan sawrkarin Non-empanelled buyer siamin sawrkar rate-in Mizoram hmun hrang hrangah lei mek a ni bawk.